Foto: Qazaq ulttyq drama teatry
Qazaqstannyń eńbek sińirgen qairatkeri, teatrymyzdyń artisi Baian Imasheva qaitys boldy. Bul týraly aktrisa eńbek etken Muhtar Áýezov atyndaǵy Qazaq ulttyq drama teatry ujymy habarlady.
"Boiyndaǵy sahna sheberine tán oilylylyq pen daralyq, teatrǵa, ónerge degen adaldyǵy - qazaq teatr óneriniń qarashańyraǵy Muhtar Áýezov atyndaǵy Qazaq ulttyq drama teatrynyń sahnasynda júzden asa ról men qazaq tarihyndaǵy san taǵdyrly áielder beinesin somdatty. Ónegege toly ómirinde, ónerge arnaǵan sanaly ǵumyrynda aktrisanyń qazaq teatry men kinosyna, mádenietine qosqan úlesi ólsheýsiz dep bilemiz.", - delingen habarlamada.
Aktrisa Baian Imasheva 1941 jyly dúniege kelgen, Túrkistan oblysynyń týmasy. Aktrisa 1964 jyldan beri Muhtar Áýezov atyndaǵy Qazaq memlekettik akademiialyq drama teatrynda qyzmet atqarǵan.
