Qazaqstan Respýblikasy Táýelsizdiginiń 30 jyldyǵyna orai «Nur Otan» partiiasynyń tapsyrmasymen «Astana» telearnasy «Qazaqstan» atty jańa án jazyp, beinebaian túsirdi, dep habarlaidy "Túrkistan" gazeti.
Án avtorlary – QR Eńbek sińirgen qairatkeri Marjan Arapbaeva (mýzykasy) men aitysker aqyn Syrym Áýezhan (sózi).
Aqyn sózi Táýelsiz eldiń tarihyn toqyraý jyldarynan osy kezge deiin jigerimen jetektep jetkizgen Elbasynyń eńbegine alǵys aityp, myzǵymas birligimizdiń beriktigi jetistikterge jetelerin aita otyryp, tyńdaýshyny jaqsylyqty kóre bilýge, ótkenge kóz júgirte otyryp, bolashaqqa senimmen qaraýǵa shaqyrady.
Maǵynaly mátindi yrǵaǵy belsendi, diapazony keń, kóńildi sharyqtatar áserli mýzyka tolyqtyryp tur.
Ánniń beinebaianynda Azattyqtyń alǵashqy 30 jylynda óndiriste, bilim men ǵylymda, sport pen meditsinada, áskeri salada jetken jetistikterdi, shegendelgen shekaramyz ben táýelsiz Qazaq eliniń týy tigilgen Almaty men elordasy Nur-Sultannyń, Túrki áleminiń rýhani astanasy – Túrkistannyń damý joly kórsetildi.
Beinebaiannyń túsirilimine kópultty memlekettegi tatýlyqtyń uiytqysy bolǵan Qazaqstan halqy Assambleiasynyń ókilderi, álemdik bilimge jol ashqan «Bolashaq» halyqaralyq stipendiiasynyń túlekteri, «Biz Birgemiz!» aktsiiasy sheńberinde jumys atqarǵan volonterlar qatysty.
Beinebaianda kórsetilip jatqan oqiǵalar Tuńǵysh Prezident-Elbasynyń tarihi sátterde sóilegen sózderimen bailanystyrylǵan.
Ándi elimizge tanymal ánshiler M.Arapbaeva, J.Aýypbaev, Z.Omarova, E.Aidar, S.Ibragimov, S.Dáýlethanovalar men «Ainalaiyn» balalar hory oryndady.
Avtorlar erlik pen eldiktiń ónegesin nasihattap, birlikke shaqyryp, rýhty kóteretin bul týyndy aldaǵy ýaqytta halyq arasynda keń taralyp, Táýelsizdiktiń 30 jyldyǵynyń beiresmi ánuranyna ainalatynyna senimdi.
