Túrkistan oblysy Tólebi aýdanynda taýda joǵalǵan eki týristi izdeýge ózbekstandyq qutqarýshylar da jumyldyryldy. Bul týraly óńirdiń TJD bastyǵynyń orynbasary Erik Sarybaev málimdedi, dep habarlaidy "Ult aqparat".
Erik Sarybaevtyń aitýynsha, kórshi eldiń qutqarýshylary izdeý sharalaryn kesheden bastap júrgizip jatyr.
«Izdeý sharalary bastalǵaly beri 350 shaqyrymnan asa aýmaq jaiaý aralandy. Sonymen qatar ushqyshsyz ushý apparattaryn paidalaný arqyly 170 shaqyrymǵa jýyq aýmaq zertteldi. «QazAviaqutqarý» AQ eki tikushaǵy arqyly 3400 shaqyrym aýmaqqa áýeden baqylaý júrgizildi. Qazirgi tańda izdeý jumysyna TJD, politsiia, UQK Shekara qyzmetiniń shekarashylary, ulttyq park qyzmetkerleri jumyldyrylǵan. Ózara is-qimyl josparyna sáikes, kesheden bastap Ózbekstan Respýblikasy, Tashkent oblysy, TJ bas basqarmasynyń qyzmetkerleri de óz aýmaqtarynda kirisip otyr. Izdestirý jumystary áli jalǵasatyn bolady»,- dedi Erik Sarybaev.
Eske salaiyq, Tólebi aýdanynyń Sairam-Ógem memlekettik ulttyq tabiǵi parkiniń aýmaǵynda 7 adamnyń joǵalǵany týraly habarlama 25 mamyrda túsken bolatyn.
Onyń úsheýi aman-esen tabylyp, úiine qaitaryldy. Al, 29 mamyr kúni saǵat 00:30-da úzdiksiz izdestirý jumystarynyń barysynda Ógem ózeninen bir adamnyń jansyz denesi tabyldy.
Ol 1999 jyly týǵan taýda joǵalyp ketken týrister tobynyń biri ekeni anyqtaldy. Ekinshi jigittiń denesi Ógem ózeninen 3 shaqyrym jerden tabylǵan.
Qalǵan eki adamdy izdestirý jumystary jalǵasýda. Jerdegi izdestirýdi qutqarýshylar, politsiia qyzmetkerleri, shekara qyzmetiniń at patrýli, ulttyq park qyzmetkerleri jáne joǵalǵandardyń týystary júrgizýde.
Sondai-aq, áýeden izdeý úshin QR TJM «Qazaviaqutqarý» AQ eki borty jumys istep jatyr.
Atalǵan fakti boiynsha Túrkistan oblysynyń politsiia departamenti sotqa deiingi tergeýdi bastady.
Saraptama taǵaiyndaldy, olardyń nátijesi boiynsha ólimniń sebebi anyqtalady.
Eske sala keteiik, biz osyǵan deiin Túrkistan oblysynda 7 adamnyń joǵalyp ketkenin jazǵan edik.
Sondai-aq izdeý jumysyna tikushaq jumyldyrylǵany aityldy.
Keiinnen joǵalǵan jeti týristiń úsheýi aman tabylǵan bolatyn. Eki kúnnen keiin taǵy eki stýdenttiń denesi tabyldy.
