Foto ashyq derekkózden
Taraz qalasyndaǵy mektep-gimnaziiada sabaq arasyndaǵy úzilis kezinde joǵary synyp oqýshylary arasynda janjal týyndap, ol tóbeleske ulasqan, dep habarlaidy Ult.kz.
Áleýmettik jelilerde oqiǵa sáti túsirilgen video taraǵan. Bilim basqarmasynyń málimetinshe, janjal saldarynan bir oqýshy aýyr jaraqat alǵan. Oǵan mekteptiń meditsinalyq kabinetinde alǵashqy kómek kórsetilip, keiin jedel járdem arqyly aýrýhanaǵa jetkizilgen.
Dárigerler jasóspirimge shuǵyl operatsiia jasaǵan. Densaýlyq saqtaý basqarmasynyń habarlaýynsha, oqýshynyń sol kózine aýyr zaqym kelgen.
«Negizgi diagnoz – sol jaq kóz almasynyń aýyr jaraqaty. Ota jasaldy. Jalpy jaǵdaiy ortasha aýyr. Aýrýhanaǵa túsken sátte de, operatsiiadan keiin de sol kózdiń kórý qabileti nólge teń boldy», – delingen resmi málimette.
Politsiia atalǵan derek boiynsha qylmystyq is qozǵap, kúdikti oqýshyny ýaqytsha ustaý izoliatoryna qamady. Tergeý amaldary júrgizilýde. Quqyq qorǵaý organdary barlyq qatysýshylardyń áreketine quqyqtyq baǵa beriletinin, sondai-aq ata-analardyń tárbielik mindetin oryndaý máselesi de qaralatynyn málimdedi.
