Jambyl oblysynda áskeri qoimadaǵy jarylystan qaza tapqan azamattar men olardyń áielderiniń qaryzy keshirildi. Bul týraly Óńirlik kommýnikatsiialar qyzmetiniń baspasóz alańynda oblys ákimi Berdibek Saparbaev málimdedi.
Elimizdiń qarjy naryǵyn retteý jáne damytý agenttigi Jambyl oblysy ákimdigimen, banktermen jáne ózge de qarjylyq uiymdarmen birlesip, Baizaq aýdanynda jarylystan qaza tapqan azamattardyń otbasylarynyń boryshtyq júktemesin azaitý boiynsha sharalar qabyldady.
"Banktermen, mikroqarjy uiymdarymen jáne kollektorlyq agenttiktermen júrgizgen jumystarymyz nátijesiz aiaqtalǵan joq. Tótenshe oqiǵa saldarynan qaza bolǵan azamattardyń – qaryz alýshylar men olardyń artynda qalǵan jesirleriniń bereshekterin tolyq kólemde esepten shyǵarý jóninde biryńǵai sheshim shyqty. Búgingi tańda 47 nesie boiynsha bereshek tolyǵymen óteldi", - dedi Saparbaev.
Onyń sózine qaraǵanda, jergilikti bilik budan ózge de kómek kórsetý sharalaryn qolǵa alǵan.
Aita keteiik, 26 tamyz kúni Baizaq aýdanynda ornalasqan 28349 áskeri bólimi aýmaǵynda bolǵan órt pen jarylys kezinde 17 azamat kóz jumǵan bolatyn. 1 adam habar-osharsyz ketken. Qaza bolǵandardyń arasynda tótenshe jaǵdailar departamentiniń, prokýratýranyń qyzmetkerleri men áskeri qyzmetshiler bar.
