«Qazgidromet» RMK direktory Danara Álimbaeva tamyz aiynyń aýa raiy boljamyn jariialady, dep habarlaidy QazAqparat.
«Tamyz – jazdyń sońǵy aiy. Aýanyń ortasha ailyq temperatýrasy tamyz aiynda shilde aiynan qaraǵanda soltústikte 2-2,5 gradýsqa, al ońtústik oblystarda 1 gradýsqa tómen bolady. Qazaqstannyń soltústiginde aýanyń ortasha ailyq temperatýrasy 16-20 gradýsqa ońtústikke qarai joǵarylai otyryp, qiyr ońtústikte 27-29 gradýsqa jetedi. Konsýltativti boljamǵa sáikes jazdyń sońy aiy klimattyq norma shamasynda bolady dep kútilýde. Tamyz aiynda aýanyń ortasha ailyq temperatýrasy Qazaqstan aýmaǵynyń basym bóliginde norma shamasynda bolady. Soltústik jartysynda norma 17-22 gradýs», - dedi Danara Álimbaeva OKQ-da ótken baspasóz máslihatynda.
Onyń aitýynsha shyǵys aimaqtardyń taýly-bókterli aýdandarda 15-16 gradýs, batys jáne ońtústik aimaqtarda 23-27 gradýs shamasynda saqtalady. Aýa temperatýrasy qalypty shamada bolady.
«Osyǵan qaramastan aýa massalarynyń jii almasýyna bailanysty jaýyn-shashynsyz ystyq kúnder men salqyn, jaýyndy kúnder qatar bolady. Bul Skandinaviia aimaǵynan sýyq aýa massalarynyń enýine jáne Jerorta teńizi men Irannan shyǵatyn ońtústik tsiklondarmen bailanysty. Tamyz aiynda jaýyn-shashyn mólsheri resýpblikanyń basym bóliginde norma shamasynda kútiledi. Respýblikanyń ońtústiginde norma 2-9 mm, batys pen ortalyq – 11-24 mm. Soltústik Qazaqstan oblysynda normadan kóp kútilýde – 40-53 mm, Qostanai oblysynda 17-55 mm, Aqmola oblysynda – 20-41 mm, Pavlodar oblysynyń soltústik batysynda 23-40 mm, Qaraǵandy oblysynda – 11-17 mm, BQO jáne Aqtóbe oblysynyń soltústiginde – 17-27 mm, al Almaty oblysynyń taýly jáne taý-bókterli aýdandarynda – 18-90 mm», - dedi ol.
