Aýǵanstannyń soltústik batysyndaǵy Gerat qalasynda tálipter alańǵa tórt adamnyń denesin ilip qoidy. Bul týraly jergilikti BAQ jáne kýágerler habarlady, dep jazady Azattyq.
Jergilikti eki tilshiniń sózine súiengen britandyq BBC agenttigi adam urlaýǵa qatysy bar dep aiyptalǵan tórt adamnyń denesi qalanyń túrli bóligine ilinip qoiǵanyn jazdy. Qaladaǵy negizgi alań mańynda ornalasqan dárihananyń iesi Ahmad Seddiki Associated Press agenttigine áýeli tórt máiittiń alańǵa ákelingenin, keiin úsheýi qaladaǵy ózge alańdarǵa áketilgenin aitty.
Provintsiia gýbernatorynyń orynbasary Ahmad Omardyń aitýynsha, bul adamdar "Taliban" (Joǵarǵy sot sheshimine sáikes, Qazaqstanda qozǵalysqa tyiym salynǵan) sodyrlarymen qaqtyǵys kezinde adam urlaǵannan keiin atyp óltirilgen.
"Ózgelerge sabaq bolsyn dep qaladaǵy alańdarǵa deneleri ilindi" dedi Omar DPA agenttigine.
Áleýmettik jelide jariialanǵan videoda Gerat alańynda shynjyrǵa oralǵan qansyraǵan er adamnyń denesi kótergish kranda asylyp turǵany baiqalady. Keibir adamdar olardy uialy telefondaryna túsirip jatty.
Tálipter taǵaiyndaǵan politsiia basshysy Ziaýlhaq Jalalidiń sózine qaraǵanda, tálipter atys kezinde adam urlaýǵa tyrysqan tórt adamnan ákeli-balaly eki adamdy arashalap qalǵan.
"Taliban" qozǵalysynyń negizin qalaýshylardyń biri Nuriddin Týrabi molda osy aptada Associated Press agenttigine tálipter darǵa asý men qoldy shabý siiaqty jazalaý túrlerin qaitadan qolǵa alatynyn, biraq ony jariia túrde jasamaitynyn aitqan.
Aýǵanstandy 1996 jáne 2001 jyldary basqaryp turǵan shaqta "Taliban" dúre soǵý, tas atyp óltirý, qol-aiaqty shabý siiaqty qatań jaza túrlerin qoldanǵan.
