Foto: Ashyq derekkóz
Talǵar qalasynda jeti balanyń ákesi kisi qolynan qaza tapty. Aldyn ala málimetterge sáikes, marqumnyń denesinen 30-dan asa pyshaq jaraqaty anyqtalǵan, dep habarlaidy Ult.kz.
Marqumnyń otbasy múddesin qorǵap júrgen advokattar Asylbek Ábdiraimov pen Jandos Palmanovtyń aitýynsha, oqiǵa 14 aqpanda bolǵan.
Olardyń sózinshe, qylmysqa kúdikti retinde marqumnyń jubaiy men onyń anasy tanylǵan. Atalǵan derek boiynsha is Qazaqstan Respýblikasy Qylmystyq kodeksiniń 99-baby 2-bóligi 7-tarmaǵy ("Aldyn ala sóz bailasý arqyly toppen jasalǵan kisi óltirý") negizinde tirkelgen.
Advokattardyń málimetinshe, janjaldyń týyndaýyna er adamnyń Talǵar politsiiasyna attarynyń urlanǵany týraly aryzdanýy sebep bolýy múmkin. Buǵan deiin quqyq qorǵaý organdary áieldiń jylqylardy urlap, satýǵa qatysy bar ekenin anyqtaǵany aitylǵan. Tergeý nusqasyna sáikes, shabýyl er adam uiyqtap jatqan kezde jasalǵan. Marqumnyń artynda jeti balasy qaldy.
Almaty oblystyq politsiia departamentiniń baspasóz qyzmeti atalǵan fakti boiynsha qylmystyq is qozǵalǵanyn rastady.
«Otbasylyq-turmystyq janjal negizinde top bolyp jasalǵan kisi óltirý deregi boiynsha tergeý júrgizilýde. Kúdiktiler ustalyp, ýaqytsha ustaý izoliatoryna qamaldy», – dep habarlady vedomstvo ókilderi.
Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan tergeý áreketteri júrgizilip jatyr.
