Búgin Taldyqorǵanda belgili jýrnalist, halqynyń aiaýly perzenti Beisen Quranbektiń esimi jýrnalister úiine berildi, dep habarlaidy QazAqparat portaly.
2014 jyly paidalanýǵa berilgen ǵimarattyń mańdaishasyna «Beisen Quranbek atyndaǵy jýrnalister úii» dep jazyldy.
Sharaǵa Jetisý oblysynyń ákimi Beibit Isabaev, QR Parlamenti Senatynyń depýtaty Nurtóre Júsip, Májilis depýtaty Janarbek Áshimjan, televiziia ardageri Qainar Oljai arnaiy kelip qatysty.
Olar tarihi kúnde Beisen Quranbektiń qazaq televiziiasyna qosqan úlken úlesin tilge tiek etip, jyly estelikter aitty.
«Aitýǵa ońai» baǵdarlamasymen halqynyń júreginen oryn alyp, súiikti telejúrgizýshisi, halqynyń janashyry bolǵan Beisen Quranbek osy esimi berilgen jýrnalister úiiniń salynýyna tikelei atsalysqan azamat.
Bul ǵimaratta «Jetisý telearnasynyń», oblystyq «Jetisý» jáne «Ogni Alataý» gazetteriniń ujymdary, sondai-aq respýblikalyq telearnalardyń óńirdegi tilshileri otyrady.
Qazaq televiziiasynyń damýyna úlken úles qosqan Beisen Quranbek ózi júrgizgen «Aitýǵa ońai», «Qareket» baǵdarlamalarynda halyqtyń áleýmettik máselelerin talqylady.
Jýrnalist júrgizgen baǵdarlamalary arqyly qiyndyqqa tap bolǵan qansha adamǵa demeý bola bildi. Júzdegen adamnyń túitkilin sheshýge járdemdesti.
Keń peiildi júregimen, ár habaryna bar ynta-jigerimen, shynaiy súiispenshiligimen qaraǵanynyń nátijesinde halqynyń súiikti jýrnalisine, al «Aitýǵa ońai» baǵdarlamasy kórermenniń súiip kóretin baǵdarlamasyna ainaldy.
Beisen Quranbek 1971 jyldyń 9 jeltoqsanynda Almaty oblysy Kerbulaq aýdany Qyzyljar aýylynda dúniege kelgen. Ál-Farabi atyndaǵy Qazaq ulttyq ýniversitetin bitirgen.
Eńbek jolyn respýblikalyq «Sport» gazetinde tilshi, jaýapty hatshy qyzmetinen bastaǵan.
Al qalǵan ǵumyryn qazaq televideniesimen bailanystyryp, «Rahat», «31 arna», «Habar» arnalarynda, Prezident teleradiokesheninde qyzmet atqarǵan.
2007-2012 jyldary Almaty oblystyq «Jetisý» telearnasynyń bas direktory boldy.
2013-17 jyldary «Qazaqstan» telearnasyndaǵy jalpaq jurtqa tanymal «Aitýǵa ońai» áleýmettik-turmystyq tok-shoýynyń júrgizýshisi boldy.2017 jyldyń qyrkúiek aiynan beri ulttyq arnadaǵy «Qareket» baǵdarlamasyn júrgizdi.
2014 jyldyń qazan aiynda Almaty oblystyq «Jetisý» telearnasynyń bas direktory bolyp qaita taǵaiyndaldy.
Qazaqstan prezidenti syilyǵyn 2006 jyly alǵan jáne «Qazaqstan mádeniet qairatkeri» ataǵymen marapattalǵan.
Ol 2020 jyly 18 mamyrda tańerteń Taldyqorǵan qalasynda aýyr naýqastan qaitys boldy.
Beisen Quranbektiń jarqyn beinesi áriptesteriniń júreginde máńgi saqtalady.
