Qyzylordada qutqarýshylar Syrdariiaǵa sýǵa batyp ketken ekinshi balanyń denesin tapty, dep habarlaidy "Ult aqparat".
Eske salsaq, oqiǵa keshe, 1 maýsymda Qyzylorda qalasyna qarasty Tasbóget kentinde bolǵan. Dariiaǵa shomylýǵa barǵan eki bala sýǵa batyp ketken. Olardyń biriniń denesi sol mańda júrgen balyqshy jaǵaǵa alyp shyqqan. Ol bala 2008 jyly dúniege kelgen jasóspirim ekeni anyqtaldy.
«Ekinshi balany Tótenshe jaǵdailar departamenti qutqarýshylary sol kúni izdestirdi. Izdeý nátije bergen joq. Izdestirý sharalary búgin, 2 maýsymda jalǵasty. Balanyń denesi saǵat 9.04-te ózi sýǵa túsken jerden 100 metrdei qashyqta sý astynan tabyldy», - dep málim etti oblystyq Tótenshe jaǵdailar departamenti Órt sóndirý jáne avariialyq qutqarý jumystary qyzmetiniń baspasóz hatshysy Áliia Erejepova.
