Jambyl oblysynda qýańshylyqtyń aldyn alý úshin qandai sharalar atqarylyp jatqanyn aimaq basshysy Berdibek Saparbaev aityp berdi, dep habarlaidy QazAqparat.
«Bizdiń aimaqqa 1 mrld 800 mln tekshe metr sý qajet, onyń 80 paiyzyn biz Qyrǵyz elinen alamyz. Jáne oblys aýmaǵynda 3 sý qoimasy bar. Ótken jyly 2 sý qoimaǵa óndiristik qýatn arttyrý maqsatynda jóndeý jumysyn júrgizdik. Endigi ýaqytta sol 2 sý qoimany barynsha paidalanyp, ózen-kólderdi sýmen toltyrýymyz kerek», - dedi Berdibek Saparbaev OKQ-de ótken baspasóz máslihatynda.
Ákimniń sózine sensek, atalǵan óńirde sý qory jetkilikti.
«Bizde 600 sý uńǵymasy bar. 10 myń gektarǵa jýyq jerdi jerasty sýymen qamtamasyz ete alamyz. Búginde Almatydaǵy aýyl sharýashylyq ǵylymi institýtymen birge jumys istep jatyrmyz. Árine, bul jerde jańa tehnologiianyń kómeginsiz bolmaidy. Ol degenimiz - zamanaýi tehnologiianyń kómegimen ylǵaldy saqtaý, jańbyrdy paidalaný jáne taǵy sol siiaqty. Sonymen qatar sharýa qojalyqtaryna da sýdy kezekpen jáne eseptep beretin bolamyz. Iaǵni, barlyǵyna birdei jetýi úshin. Ásirese bul Qordai, Jambyl jáne Baizaq aýdandaryna qatysty. Sebebi atalǵan aýdandar sý máselesine kelgende Qyrǵyz eline táýeldi», - deidi ol.
