Foto: Úkimet
Premer-ministr Oljas Bektenov Aqmola oblysyna jumys sapary barysynda sý tasqyny jaǵdaiymen tanysyp, Tótenshe jaǵdailardy joiý jónindegi respýblikalyq jedel shtabtyń otyrysyn ótkizdi. Jiynda tirshilikti qamtamasyz etý nysandarynyń úzdiksiz jumysyn saqtaý jáne yqtimal qaýipterdiń aldyn alý máseleleri qaraldy, dep habarlaidy Ult.kz.
Aqmola oblysynda biyl 163 eldi meken men 32 jol ýchaskesi sý tasqynyna qarsy sharalarmen qamtylǵan. Birqatar ózen arnalary tazartylyp, tereńdetildi, gidrotehnikalyq qurylystar nyǵaityldy. Úkimet basshysy qalyń qar, topyraqtyń tońy jáne mol jaýyn-shashyn sý tasqyny qaýpin arttyrýy múmkin ekenin atap ótip, ákimderge bir apta ishinde táýekeli joǵary eldi mekenderdi aralap, naqty shara qabyldaýdy tapsyrdy.
Ministrlikterdiń málimetinshe, el boiynsha sý basý qaýpi bar 1242 eldi meken anyqtalǵan. Tótenshe jaǵdailardyń aldyn alý úshin 39 myńnan astam adam, 18 myńnan astam tehnika daiyndyqqa keltirildi. Sý qoimalary baqylaýda, joldar men kópirlerge táýlik boiy monitoring júrgizilýde.
Sondai-aq «Tasqyn» aqparattyq júiesi arqyly táýekelderdi modeldeý jalǵasyp jatyr. Premer-ministr derekterdi óńirlerge jedel jetkizip, aldyn alý jumystaryn kúsheitýdi tapsyrdy.
Jiyn qorytyndysy boiynsha memlekettik organdarǵa gidrologiialyq monitoringti kúsheitý, sý qoimalaryn baqylaý, jol infraqurylymyn qadaǵalaý, qar shyǵarý jáne qajet bolǵan jaǵdaida evakýatsiia sharalaryn pysyqtaý jóninde naqty mindetter júkteldi.
Úilestirý jumysy Premer-ministrdiń orynbasary Qanat Bozymbaevqa tapsyryldy.
