Shyǵys Qazaqstan oblysynyń Ulan aýdanynda politsei óz ómirin qaterge tigip, káriz qudyǵyna túsip ketken eki jumysshyny qutqaryp qaldy, dep habarlaidy ult.kz.
Oqiǵa 20 tamyzda saǵat 14:30 shamasynda Qasym Qaisenov kentinde bolǵan. «Molodejnyi» KMK-niń eki qyzmetkeri №11 úidiń mańynda káriz qubyrlaryn tazalap jatqan.
Jumys kezinde qyzmetkerlerdiń biri qudyqqa túsip, esinen tanyp qalǵan. Áriptesin qutqarmaq bolǵan ekinshi jumysshy da qudyqqa túsken, alaida ol da esinen aiyrylǵan.
Oqiǵany sol mańnan ótip bara jatqan Ulan aýdandyq kriminalisi Aset Naǵashbaev baiqap, adamdardyń kómek suraǵan daýysyn estigen. Ol dereý ýchaskelik politsiia inspektoryna habarlaǵan.
Kóp uzamai oqiǵa ornyna politsiia maiory Nurdáýlet Tetepov jetken. Ár sekýndtyń mańyzdy ekenin túsingen politsei arqan aldyryp, ony bekitip, káriz qudyǵyna ózi túsken. Ol aldymen bir jumysshyny, keiin ekinshisin syrtqa shyǵarýǵa kómektesken.
Qutqarylǵan eki azamat jedel járdem qyzmetkerlerine tapsyryldy.
Politsiianyń málimetinshe, Aset Naǵashbaevtyń qyraǵylyǵy men Nurdáýlet Tetepovtiń batyl áreketiniń arqasynda eki jumysshynyń ómirin saqtap qalý múmkin bolǵan.
