Rio Olimpiadasynda jeńiske jetken jáne júlde alǵan sportshylarǵa AQSh-tyń Olimpiada komiteti qomaqty qarjy bólip otyr. Sonymen qatar, sportshylar alǵan júldesi úshin salyq tóleidi, dep jazady MarketWatch.
Beisenbi kúngi málimet boiynsha, Amerika quramasy Olimpiadanyń jalpy medaldar kestesinde kósh bastap tur. Naqtyraq aitqanda, amerikalyq sportshylar barlyǵy 93 medal aldy. Olardyń 30-y altyn, 32-si kúmis, 31-i qola medal. «Altyn» úshin olimpiadashylarǵa 25 myń, «kúmis» úshin 15 myń, «qola» úshin 10 myń dollar tólenedi.
AQSh-tyń salyq organdarynyń sózderinshe, atalǵan medaldarǵa salyq salynady.
AQSh-ta salyq salýdyń arnaiy erejesi bar. Iaǵni, tabysy neǵurlym kóp azamattar salyqty da kóp tóleidi. Onda kiris mólsherine bailanysty salyqtyń 7 dárejesi bar jáne salyq stavkasy 10-nan 39,6 paiyzǵa deiin jetedi.
Jalpy alǵanda, AQSh sportshylarynyń tabystary asa úlken emes. Alaida, olardyń arasynda demeýshilermen kelisimshart negizinde kóp tabys tabatyn sportshylar da bar. Mysaly, gimnast Aleksandra Raisman Ralph Lauren jáne Reebok pen Pandora zergerlik kompaniiasymen birden birneshe kelisimshart jasaǵan.
Rio Olimpiadasynda ol bir altyn, eki kúmis medal jeńip alyp, 55 myń dollar tabys tapty. Onyń 21,8 myńy salyqqa tólenýi múmkin.
