Foto: ortcom.kz
Atyraý oblysynda 83 jastaǵy enesin óltirgen 40 jastaǵy áiel qylmystyq jaýaptylyqtan bosatylyp, májbúrli emdeýge jiberiletin boldy, dep habarlaidy Ult.kz.
Qaiǵyly oqiǵa 2025 jyldyń 27 mamyrynda Qyzylqoǵa aýdanynda bolǵan. Is materialdaryna sáikes, shamamen saǵat 17:30-da kúieýi balalaryn syrtqa alyp ketken kezde áiel tósek tartyp jatqan enesine pyshaqpen shabýyl jasaǵan.
Atyraý oblysynyń qylmystyq ister jónindegi mamandandyrylǵan aýdanaralyq sotynyń sýdiasy Zarema Hamidýllina sottalýshy jábirlenýshiniń basyna birneshe ret pyshaq suqqanyn málimdedi. Saldarynan aýyr jaraqat alǵan 83 jastaǵy keiýana aýrýhanada kóz jumdy.
Birneshe sot-psihiatriialyq saraptama nátijesine sáikes, aiyptalýshy qylmysty esi durys emes kúide jasaǵan. Oǵan «paranoidty shizofreniia» diagnozy qoiylǵan. Osyǵan bailanysty ol QR Qylmystyq kodeksiniń 99-baby 2-bóligi 3-tarmaǵy boiynsha esi durys emes dep tanylyp, qylmystyq jaýaptylyqtan bosatyldy.
Tergeý barysynda otbasyndaǵy kelispeýshilikter oqiǵaǵa túrtki bolǵany anyqtaldy. 2025 jyldyń 10 mamyrynda azamat qart anasyn Jasqairat aýylyna kútim jasaý úshin úiine ákelgen. Áieli buǵan qarsy bolyp, janjal týyndaǵan.
Sýdianyń aitýynsha, sottalýshynyń jaqyndary onyń psihikalyq aýrýyn baiqamaǵanyn aitqan. Alaida minez-qulqyndaǵy ózgerister, sebepsiz ashýlaný jáne óz-ózimen sóilesý sekildi belgiler bolǵan.
Úkim zańdy kúshine engennen keiin áiel Almaty oblysyndaǵy mamandandyrylǵan psihiatriialyq statsionarǵa májbúrli emdeýge jiberiledi. Buǵan deiin ol Atyraýdaǵy meditsinalyq mekemede baqylaýda bolǵan.
