Máskeý qalalyq soty sársenbi kúni keshke Aleksei Navalnyi negizin qalaǵan "Jemqorlyqpen kúres qory" (FBK) men Navalnyi shtabtaryn, buǵan qosa "Azamattardyń quqyǵyn qorǵaý qoryn" "ekstremistik uiym" dep tanyp, Resei aýmaǵyndaǵy qyzmetine tyiym saldy.
Sot atalǵan uiymdardy jabýdy uiǵardy. Olar jumysyn dereý toqtatýy tiis. Alaida sot sheshimi apelliatsiialyq instantsiiada qaita qaralýy múmkin.
Sheshimniń shyǵýyna prokýratýra shaǵymy túrtki bolǵan. Sot otyrysy 12 saǵattan astam ýaqytqa sozyldy. Sot otyrysynyń sońynda "Jemqorlyqpen kúres qorynyń" advokattary sottyń isti birjaqty qarap jatqanyn alǵa tartyp, protsesten shyǵyp ketti.
Advokat Ivan Pavlovtyń sózine qaraǵanda, FBK-nyń ruqsat etilmegen aktsiiaǵa qatysýshylardyń aiyppulyn tólep berýge ýáde etýin aiyptaý taraby "ekstremistik áreketti qarjylandyrý" dep baǵalaǵan.
Qujattardyń bir bóligi "qupiia" bolǵandyqtan sot tyńdaýy jabyq ótti. Sońǵy otyrys kezinde qorǵaý tarabynyń isti qupiialandyrmaý týraly ótinishi qanaǵattandyrylmady.
Qamaýda otyrǵan Navalnyidyń Instagramdaǵy paraqshasynda sottan keiin tómendegidei habarlama paida boldy:
"Maqsattarymyz men ideialarymyzdan bas tartpaimyz. Bul bizdiń el, bizde basqa Otan joq".
Jaqynda qabyldanǵan zańǵa sáikes, FBK nemese shtabta jumys istemegen Navalnyi jaqtastarynyń áreketi "ekstremistik uiymdy qoldaý" dep tanylsa, olar kez kelgen deńgeidegi sailaýǵa túse almaidy.
16 sáýirde Máskeý prokýrory Denis Popov sotqa shaǵym túsirip, Navalnyi uiymdaryn "ekstremistik" dep tanýdy suraǵan. Prokýratýra ókilderiniń pikirinshe, FBK jáne ózge de uiymdar Reseidegi áleýmettik jáne qoǵamdyq-saiasi jaǵdaidy turaqsyzdandyryp otyr.
26 sáýirde Máskeý qalalyq soty Navalnyidyń aimaqtaǵy shtabtarynyń jumysyn toqtatqan, 27 sáýirde FBK men Azamattardyń quqyqtaryn qorǵaý qorynyń jumysy toqtatyldy. 29 sáýirde Navalnyidyń aimaqtaǵy shtabtarynyń úilestirýshisi Leonid Volkov uiym taratylǵanyn habarlady. Ol shtabtar jabylmasa, Navalnyidyń jaqtastaryna qaýip tónýi múmkin dep málimdegen.
