Soltústik Qazaqstan oblysynda shilde-tamyz ailarynda aýa temperatýrasy ádettegi normaǵa sai bolsa, sinoptikterdiń boljamynsha jaýyn-shashyn mólsherden artyq jaýmaq, dep habarlaidy "Ult aqparat".
«Qazgidromet» RMK SQO boiynsha filialy jaz ailaryna aýa raiynyń boljamyn jariialady.
Sinoptikterdiń málimetinshe, maýsym aiynyń sońynda óńirde aýa temperatýrasy túnde +5+10 ° S, kei jerlerde +13+20 ° S-qa deiin, kúndiz +15+20 ° S-tan, kei jerlerde +23+33 ° S-ke deiin kóteriledi.
Soltústik-batystan, batystan soǵatyn jeldiń kúshi sekýndyna 15-20 metrge deiin jetpek.
«Shildede aýanyń ortasha ailyq temperatýrasy +19+20°S bolady dep boljanǵan, bul norma. Aidyń ár onkúndiginde Atlant jáne Qara teńiz aýdandarynan sýyq jáne ylǵaldy aýa massalarynyń basyp kirýi nátijesinde qysqa merzimge kún sýytady. Oblys boiynsha jaýyn-shashyn, ekpindi jel jáne aýa temperatýrasynyń túnde +7+12°S, kúndiz +17+23°S deiin tómendeýi boljanǵan», - deidi meteoboljaý bóliminiń basshysy Gúlzat Ǵazizova.
Al Iran men Orta Aziia aýdandarynan ystyq tropikalyq aýanyń kelýine bailanysty temperatýra aitarlyqtai joǵarylamaq.
Termometr baǵany túnde +15+20°S-ke deiin, kúndiz +30+32°S belgisine deiin kóteriledi.
«Jaýyn-shashyn mólsheri shildede oblystyń basym bóliginde normadan artyq bolmaq, jalpy norma - 53-69 mm. Bir ai boiy qysqa merzimdi jańbyr jaýyp, naizaǵai jii bolady dep boljanǵan. Tamyz aiynda da jaýyn-shashyn mólsherden artyq 40-53 mm jaýady. Al aýa temperatýrasy qalypty, +17+18°S shamasynda bolady», - deidi Gúlzat Ǵazizova.
