Soltústik Qazaqstan oblysynda jabaiy qustardan qus tumaýy anyqtalyp, aýrý taralmaýy úshin aldyn alý jumysy atqarylyp jatyr, dep habarlaidy "Ult aqparat".
6 maýsym kúni Aiyrtaý aýdanyndaǵy Saýmalkól kóliniń jaǵasynan 102 dala úiregi men 2 shaǵalanyń óleksesi tabyldy.
SQO veterinariia basqarmasynyń málimetinshe, Nur-Sultan qalasyndaǵy veterinariia boiynsha referent ortalyǵy qustardyń qus tumaýynan ólgenin anyqtaǵan.
«Qus ólekseleri jinap alynyp, órteldi. Epizootikalyq jaǵdaidy baqylaýda ustaý úshin veterinarlyq qyzmet pen qalǵan tiisti organdar sý qoimalaryna kúndelikti monitoring júrgizip jatyr. Ańshylar men turǵyndar eskertildi. Ázirge qustardyń qyrylýynyń jańa jaǵdailary tirkelgen joq», - deidi basqarma mamandary.
Jabaiy qustardan aýrýdy juqtyrmaý úshin Saýmalkól kóliniń mańyndaǵy eldi mekenderdiń úi qustaryna aldyn alý vaktsinasy qoiylyp jatyr.
Búginge deiin Saýmalkól jáne Krasnogorka aýyldarynda 7 600 qusqa ekpe egildi. Jalpy oblysta 478 200 qus vaktsinatsiiadan ótti.
