Soltústik Qazaqstan oblysyndaǵy Esil aýdanynda joǵalyp ketken 8 jasar qyzdy politseiler men qutqarýshylar izdep jatyr, dep habarlaidy "Ult aqparat".
8 maýsym kúni saǵat 23.30-da Esil aýdany Iavlenka eldi mekenindegi №10 órt sóndirý bólimine Pokrovka aýylynda 2012 jyly týǵan qyzdyń habarsyz ketkeni jaiynda habarlama túsedi.
9 maýsym kúni saǵat 10.00-de SQO TJD jedel-qutqarý jasaǵynyń súńgýirleri, aýdandyq bólimniń qutqarýshylary jáne politseiler, jergilikti atqarýshy organ ókilderi joǵalǵan qyzdy izdeýdi bastady.
8 jasar qyz úiinen saǵat 20.00 shamasynda eshkimge aitpai shyǵyp ketken.
Esil ózeniniń jaǵasynan jetkinshektiń kiimi tabyldy.
«Esil ózeniniń túbi jáne ózenniń boiy tekserilip jatyr. Jeke quramnan 19 adam, 5 tehnika jáne eki qaiyq jumyldyryldy. Izdeý jumystary jalǵasady», - deidi SQO TJD Esil aýdandyq tótenshe jaǵdai bóliminiń bas mamany Kenjebek Qojahmetov.
SQO politsiia departamenti baspasóz qyzmetiniń málimetinshe, 8 jasar qyz aýylǵa jazǵy demalysqa qonaqqa kelgen. Keshke jaqyn úiine oralmaǵan soń ájesi ýchaskelik politsiia inspektoryna aitady. Ol eriktiler men TJ qyzmetkerlerin jumyldyryp, balany izdeidi. Ózen jaǵasynda, shamamen aýyl shetinen 500 metrdei jerde qyzdyń kiimderi tabyldy.
Kúndiz ol ózimen teteles nemere inisimen oinaǵan. Bala úiine oralǵan soń, qyzben birge sýǵa túskenin jáne ony aǵys alyp ketkenin aitqan.
«Ótinish keshki saǵat 23 shamasynda kelip tústi. Túni boiy izdestirildi. Qazir jumys jalǵasýda. Súńgýirler shaqyryldy»,- deidi Esil aýdanynyń PB bastyǵy Erlik Eslámbekov.
