Soltústik Qazaqstan oblysynda anasymen kartop otyrǵyzyp júrgen 13 jastaǵy bala baqshadan eski granata taýyp aldy, dep habarlaidy "Ult aqparat".
SQO politsiia departamenti baspasóz qyzmetiniń málimetinshe, Qyzyljar aýdanyndaǵy aýyldardyń birinde kartop otyrǵyzý úshin jer qazyp júrgen 13 jasar bala tot basqan granataǵa uqsas zat taýyp alǵan. Qasynda júrgen anasyna kórsetip, ol kórshisine aparyp kórsetýge keńes bergen. Er adam qaýipti zatty abailap jerge qoiyp, birden politsiiaǵa habarlapty.
Jarylǵysh zatty áketýge mamandar kelgenge deiin, aýdandyq politsiia bóliminiń qyzmetkerleri granata jatqan jerdi qorshaýǵa alyp, 500 metrdei radiýstaǵy úilerdiń turǵyndaryn qaýipsiz jerge evakýatsiialady. Qaýipti zat arnaiy konteinerge ornalastyrylyp, zertteýge jiberildi. Keiin granata áskeri bólimniń poligonynda joiylady.
«Tabylǵan zattyń granata ekeni anyqtaldy. Bizdiń boljamymyz boiynsha ol Mills jaryqshaqty granatasy. Mundai jarylǵysh zat Birinshi Dúniejúzilik jáne Azamat soǵysynda qoldanylǵan. Syrtyn tot basqan, tańbasy kórinbeidi. Tutandyrǵyshy bolmaǵanymen, ishindegi zaty qaýipti bolýy múmkin. Sondyqtan osyndai eski qarý-jaraq tapqanda tiispei, politsiiaǵa habar bergen jón», - deidi Qyzyljar aýdandyq politsiia bóliminiń bastyǵy Álihan Baiqadamov.
