Foto: Habar24
Semeide kámeletke tolmaǵan jasóspirim ulttyq arazdyqty qozdyrǵany úshin sottaldy, dep habarlaidy Ult.kz.
Abai oblysynyń kámeletke tolmaǵandardyń isteri jónindegi mamandandyrylǵan aýdanaralyq soty QR Qylmystyq kodeksiniń 174-baby boiynsha aiyptalǵan jasóspirimge qatysty qylmystyq isti qarady.
Sot materialdaryna sáikes, 2025 jyldyń aqpan aiynda kámeletke tolmaǵan B. násilshil «skinhedter» qozǵalysynyń kózqarastaryn qoldai otyryp, Telegram messendjerinde Skinheads industries-Semey atty chat qurǵan. Toptyń ákimshisi bola otyryp, ol ulttyq belgisi boiynsha adamdardy kemsitetin jazbalar men aýdiohabarlamalar jariialaǵan. Atap aitqanda, Úndistannan kelgen stýdentter men olardyń mádenietin qorlaityn pikirler taratqan.
Sonymen qatar jasóspirim chat qatysýshylaryn óz kózqarasyn qoldaýǵa shaqyryp, basqa adamdardy, sonyń ishinde kámeletke tolmaǵandardy da osy qaýymdastyqqa tartýǵa tyrysqan. Osylaisha Semei aýmaǵynda ekstremistik ideialardy taratýǵa áreket jasaǵan.
Memlekettik aiyptaýshy sottan B.-ǵa 1 jyl 4 ai merzimge bas bostandyǵyn shekteý jazasyn taǵaiyndaýdy surady. Jasóspirim sotta óz kinásin tolyq moiyndap, jasaǵan isine ókinish bildirgen.
Sot QR Qylmystyq kodeksiniń 55-baby men 81-babynyń talaptaryn eskere otyryp, oǵan 1 jyl 4 ai merzimge bas bostandyǵyn shekteý jazasyn taǵaiyndady.
Sot úkimi zańdy kúshine endi.
