Balalar ádebieti degende balalarǵa arnap jazatyn aqyn-jazýshylardy atap jatatynymyz ras. Degenmen balalarǵa arnap jazatyn balalar da bar. Osy oraida «Ult» portaly ertegi jazatyn erke qyzben tanystyrýdy jón kórip otyr. 12 jastaǵy Raziia Aqpar «Ertegi álemindegi hanshaiym» atty alǵashqy jinaǵyn shyǵaryp úlgergen jas avtor. Nur-Sultan qalasynda №72 mektep-litseidiń 7-synybyn bitirgen jazýshy qyz búginde áleýmettik jelilerde tanylyp kele jatyr.
«Bastaýysh synyptan beri taqpaqtar, ertegiler qurastyratynmyn. Basynda tek otbasy, janýarlar týraly ertegiler jaza bastaǵanmyn. Keiin balalardy qyzyqtyratyn barlyq taqyryptarǵa jazatyn boldym. Meniń alǵashqy oqyrmanym da, alǵashqy qoldaýshym da – anam. Meniń ertegilerimdi oqyp, tańǵalysy men maqtanyshyn jasyrmai ólisip otyrady. Instagram paraqshasyna salyp, oqyrman jinai bastadyq. Alǵashqyda ertegi jazatynymdy jasyrýshy edim, óitkeni qazir oǵan eshkim qyzyqpaidy dep oilaitynmyn. Alaida olai emes eken. Shyǵarmashylyǵyma qoldaý bildirip otyrǵan anam men ustazyma alǵysym sheksiz», - dedi Raziia Aqpar.
Raziianyń ustazy oqýshysynyń osyndai qabiletti ári daryndy ekenin maqtan tutady. Túrli baiqaýlarǵa, olimpiadalarǵa qatysatyn úzdik oqýshysynyń bolashaqta myqty jazýshy, erekshe dizainer bolatynyna senimdi.
«Bizdiń Raziia mektebiniń ǵana emes, Elordanyń maqtanyshy der edim. Elimizdiń astanasynda osyndai talanttar ósip kele jatqany qýantady. Raziia sabaqta úzdik, shyǵarmashylyqta jany bólek, dosqa adam, ózi kópshil, baýyrmashyl qyz. Mektepte jazatyn shyǵarmalary da qatarlastarynan oq boiy ozyq bolady. Shyǵarmashylyq adamynyń jany názik bolady degen ras, Raziianyń júregi appaq. Kóńili taza. Onyń qabiletin qoldap, darynyn ushtap jiberse, bolashaqta myqty jazýshy shyǵady dep oilaimyn. Al salǵan sýretterine qarasańyz, talantty dizainer de shyǵatynyna senimdi bolasyz. Osyndai talantty, daryndy, úzdik qyzdy tárbielep otyrǵan ata-anasyna rizashylyǵymyzdy bildiremiz», - deidi ustazy.
Shabytty, ideiany tabiǵattan alatyn kishkentai jazýshy ertegilerin birneshe bólimge bólip qurastyrady. Bir ertegi úshin 3-4 kún ýaqyt jumsaityn Raziiaǵa kitap shyǵarý týraly oidy oqyrmandary usynǵan.
«Iá, ras, dostar oqyrmandarymnyń qoldaýynyń arqasynda «Ertegi álemindegi hanshaiym» atty týyndym jaryq kórdi. Kitaptyń ereksheligi – ózim salǵan sýrettermen bezendirilýinde. Kitapta men hanshaiym keipinde bir ertegiden ekinshi ertegige kóshemin. «Ertegi álemindegi hanshaiym» dep ataǵanym da sondyqtan. Bunda bir ǵana emes, túrli taqyrypta jazǵan ertegilerim jinaqtalǵan. Ár erteginiń oqyrmandarǵa, ásirese búldirshinderge berer tárbielik máni zor. Mysaly, «Jyl mezgilderi» degen ertegimde tórt jyl mezgilin tórt qyzǵa teńedim. Erteginiń maqsaty – adamdardy syrtynan ósekteýge bolmaitynyn úiretý. Kitapta budan ózge oqyrmandy izgilikke, adaldyq pen adamgershilikke shaqyratyn on ertegi bar. Ózime «Sóz taptary» degen ertegim qatty unaidy», - deidi Raziia.
Jas jazýshy kitabynyń tusaýkeserinen soń tanymaldylyǵy arta túsken. Túrli telebaǵdarlamalarǵa shaqyrylyp, basylym tilshileri suhbat berýin ótine bastaǵan. Eń qyzyǵy, Nur-Sultan qalasynyń ákimi Altai Kólginov syilyq berip, bolashaǵyma sáttilik tilepti. Raziia jazý, sýret salýmen qatar, toqyma toqyp, qolónermen de ainalysady. Al bolashaqta jazýshylyqpen qatar, kiim dizaineri bolǵysy keledi.
Osy oraida «Ult» portaly jaz jazýshynyń shyǵarmashylyǵyna tolaǵai tabystar tilep, barlyq arman-maqsattaryna jete bersin degen izgi tilektestigin bildiredi.
Esterińizge sala keteiik, Nur-Sultan qalasynda Raziia Aqpar esimdi jas jazýshy turady. Ol Elordadaǵy №72 mektep-litseidiń 7-synybyn bitirgen. Túrli ertegiler jazyp, sýret salyp, qolónermen ainalysqandy jany súietin shyǵarmashylyq iesi. Búginde Raziianyń «Jyl mezgilderi, «Sóz taptary» siiaqty ertegileri oqýshylar arasynda keńinen tanylǵan.
