Foto: Majid Asgaripour / WANA / Reuters
Taiaý Shyǵystyń birqatar elderindegi áskeri-saiasi ahýaldyń ýshyǵýy jaǵdaiynda Qazaqstan Respýblikasynyń Syrtqy ister ministrligi kúsheitilgen rejimde jumysyn jalǵastyrýda. Bul týraly QR SIM málimdedi, dep habarlaidy Ult.kz.
Óńirdegi shet elderdegi mekemelerdiń diplomattary jaǵdaidyń damýyn úzdiksiz baqylap, jedel áreket etý jáne konsýldyq-quqyqtyq kómek kórsetý maqsatynda jergilikti bilik organdary jáne QR azamattarymen turaqty bailanysta bolyp, áýejailarǵa júieli túrde barýda.
"Tótenshe bailanys jelileri men messendjerlerdegi jedel chattar arqyly azamattarmen táýlik boiy bailanysta bolý arqyly diplomatiialyq ókildikter qyzmetkerleri óńirde jáne tranzittik aimaqtarda ornalasqan qazaqstandyqtardyń tizimderin turaqty túrde jańartyp otyrýda.
Qazirgi ýaqytta Qazaqstan Respýblikasy azamattarynyń arasynda zardap shekkender týraly aqparat túsken joq", delingen habarlamada.
Sońǵy derekterge sáikes, shielenis aimaqtarynda Qazaqstan azamattarynyń eń kóp sany tanymal týristik baǵyttar, qajylyq saparlary oryndary, sondai-aq tranzittik habtar shoǵyrlanǵan jerlerde. Onyń ishinde BAÁ-de shamamen 3 500 adam, SAK - shamamen 3 000 adam jáne Qatarda 1 500-ge jýyq adam.
Óńirdiń basqa memleketterge kelsek, diplomatiialyq ókildikterdń aqparatyna sáikes Iranda 82 Qazaqstan azamaty, Bahreinde – 168 azamat, Kýveit pen Iordaniiada – árqaisysynda 134 azamattan, Izrailde shamamen 100 azamat tirkelgen.
Áskeri is-qimyldar bastalǵannan beri óńir elderiniń basym bóliginde áýe keńistigi jabylǵan. Áýe tasymaldaýshylary reisterdi toqtatýǵa májbúr bolǵandyqtan, Qazaqstannyń shet elderdegi mekemeleri týristik kompaniialarmen birlesip azamattardy qonaqúilerge ýaqytsha ornalastyrý jumystaryn júrgizýde. Atap aitqanda, BAÁ qonaqúilerinde bizdiń azamattarǵa jaǵdai turaqtalǵanǵa deiin turý jáne tamaqtaný qamtamasyz etilgen.
Buǵan deiin habarlanǵandai, shielenis aimaqtarynan qazaqstandyqtardy yqtimal evakýatsiialaý baǵyttary men sharalary pysyqtalýda. Qaýipsizdik maqsatynda jergilikti bilik organdary óz betinshe qozǵalmaýǵa keńes beredi.
Evakýatsiialyq reis uiymdastyrylǵan jaǵdaida birinshi kezekte qoldaý sharalary halyqtyń neǵurlym osal sanattaryna, atap aitqanda qart adamdarǵa, áielder men balalarǵa kórsetiletin bolady.
Buǵan deiin Tegeran qalasynan «Zarkýh» kompaniiasynyń ókilderin, Ekonomikalyq yntymaqtastyq uiymynyń qyzmetkerlerin jáne diplomatiialyq ókildik qyzmetkerlerin qosa alǵanda, Qazaqstannyń 50 azamaty shyǵaryldy.
