Foto: Stringer / Reuters
Qazaqstan Respýblikasynyń Syrtqy ister ministrligi Iran aýmaǵyndaǵy ahýalǵa bailanysty qazaqstandyq azamattardy evakýatsiialaý boiynsha júrgizilip jatqan jumystardyń nátijesin jariialady. Vedomstvonyń málimetinshe, kórshi elderdiń quzyretti organdarymen kelissózder nátijesinde azamattardy Irannan qaýipsiz shyǵarý tetikteri kelisilgen, dep habarlaidy Ult.kz.
Atap aitqanda, Armeniia, Ázerbaijan jáne Túrikmenstan taraptary qazaqstandyqtardyń memlekettik shekaralar arqyly ótýine járdem kórsetýge daiyn ekendigin rastady. Sonymen qatar, jedel aqparattandyrý maqsatynda ministrlik zamanaýi tsifrlyq quraldardy, sonyń ishinde Kaspi.kz infraqurylymyn paidalanǵan.
"Atqarylǵan jumys qorytyndysy boiynsha Qazaqstannyń shet elderdegi mekemeleri shet memleketterdiń quzyretti organdarymen Irannan kórshi elder arqyly azamattarymyzdy evakýatsiialaýǵa járdem kórsetý jóninde ýaǵdalastyqtarǵa qol jetkizdi.
Armian tarapymen Qazaqstan azamattarynyń Armeniia aýmaǵy arqyly evakýatsiialanýy jaǵdaiynda Iran-Armeniia shekarasynan kedergisiz ótý máselesi kelisildi. Armeniianyń syrtqy saiasi vedomstvosynyń basshylyǵymen turaqty bailanys saqtalýda.
Osyǵan uqsas jumys Ázerbaijan tarapymen de júrgizildi, olar evakýatsiia máseleleri boiynsha qoldaý kórsetýge daiyn ekendigin bildirdi. Eldiń qurlyqtaǵy shekara ótkelderindegi ótkizý tártibi shekteýli bolǵandyqtan, shekaradan ótý úshin arnaiy ruqsat qajet.
Eki azamattyń ótinishi negizinde QR-dyń Ázerbaijandaǵy Elshiligi Irannan «Djýlfa» baqylaý-ótkizý pýnkti (Nahchyvan) arqyly kirýge jedel túrde ruqsat aldy.
Túrikmenstan tarapy da qazaqstandyq azamattardyń evakýatsiiasy úshin memlekettik shekaradan ótýge járdem kórsetýge daiyn ekenin rastady.
Atalǵan baǵyttaǵy jumys úzdiksiz jalǵasýda, qosymsha túsindirmeler QR Syrtqy ister ministrliginiń jáne shet elderdegi mekemelerdiń resmi aqparattyq resýrstary arqyly jariialanyp otyrady.
Jedel aqparattandyrýdy qamtamasyz etý maqsatynda Syrtqy ister ministrligi zamanaýi tsifrlyq quraldardy, sonyń ishinde Kaspi infraqurylymyn paidalandy. Kompaniiamen birlesip habarlamalar júiesi jolǵa qoiylyp, óńirdegi azamattardyń mobildi qurylǵylaryna resmi aqparat pen túsindirmelerdiń der kezinde jetkizilýi qamtamasyz etildi.
Óńirdegi jaǵdai tolyq turaqtanǵanǵa deiin azamattardy sabyr saqtaýǵa, jergilikti bilik organdarynyń talaptary men usynymdaryn oryndaýǵa, táýekeli joǵary aimaqtardan aýlaq bolýǵa, sondai-aq ýaqytsha shekteýlerge túsinistikpen qaraýǵa shaqyramyz.
Qosymsha aqparat kelip túsýine qarai habarlanatyn bolady. Osyǵan bailanysty QR Syrtqy ister ministrliginiń jáne shet elderdegi mekemelerdiń resmi habarlamalaryn muqiiat qadaǵalap otyrýdy suraimyz", delingen habarlamada.
