© Sputnik / Sanat Imangaliev
Keshe Semeide shyrsha bezendirýge barǵan muǵalimderdiń biri aýyr jaraqat alǵany belgli boldy. Májilis depýtaty Ashat Aimaǵambetov óziniń Telegram-arnasynda bul jaǵdaidy jai "jańsaqtyq" dep sanaýǵa bolmaitynyn jazdy, dep habarlaidy Ult.kz Sputnik Qazaqstanǵa silteme jasap.
"Semei qalasynda muǵalimderdi jańajyldyq shyrshany ornatýǵa tartyp, sonyń saldarynan bir muǵalimimizdiń aýyr jaraqat alǵany alańdatty. Mundai jaǵdaidy jai ǵana “jańsaqtyq” dep qarastyrýǵa bolmaidy. "Pedagog mártebesi týraly" zańnyń 6-babynda naqty kórsetilgen: muǵalimderdi kásibi mindetterine jatpaityn jumystarǵa tartýǵa qatań tyiym salynady. Jańa jyldyq shyrsha ornatý, kóshe tazalaý, basqa da naýqandarǵa májbúrlep tartý siiaqty eski “dástúrlerden” birjola bas tartýymyz kerek. Bul – zańdy óreskel buzý", - dedi Aimaǵambetov.
Depýtat oqiǵa boiynsha naqty sharalar qajet dep mynalardy atap kórsetti:
1. Oblys basshylyǵy bul jaǵdaidy muqiiat tergep, jaýapty tulǵalardy jazalaýy tiis.
2. Muǵalimderge tikelei mindetine jatpaityn jumystarǵa tartýdy toqtatý úshin ministrlik baqylaýdy kúsheitýi qajet.
3.Bilim basqarmalary men mektep ákimshilikteri muǵalimderdiń quqyqtaryn qatań saqtaý boiynsha mindetterin oryndaýy tiis.
"Memleket basshysy árdaiym muǵalimderdiń mártebesin qorǵaý men olardyń quqyqtaryn saqtaý máselesin erekshe nazarda ustap keledi. Bizdiń mindetimiz – sol talaptardy oryndap, zańnyń jumys isteýin qamtamasyz etý", - dedi eks-ministr.
Aimaǵambetov ministrliktiń bul máseleni baqylaýǵa alǵany úmit beretinin aityp, jaraqat alǵan áriptesine tezirek saýyǵyp ketýine tilektestik bildirdi.
Eske salaiyq, Semeide shyrsha bezendirýge barǵan muǵalimderdiń biri aýyr jaraqat aldy. Bul týraly oqý-aǵartý ministri Ǵani Beisembaev áleýmettik jelidegi paraqshasynda jazdy.
