Foto: Elements.envato.com
Shymkentte mekteptegi býlling deregi qoǵamda úlken rezonans týdyrdy. Sonyń saldarynan №142 mekteptiń direktory qyzmetinen bosatyldy, dep habarlaidy Ult.kz Otyrar telearnasyna silteme jasap.
Qalalyq bilim basqarmasynyń málimetinshe, sońǵy bir jyldyń ishinde politsiiaǵa mektepter men kolledjderdegi býllingke qatysty 400-den astam shaǵym túsken. Tek biylǵy oqý jylynyń ózinde 22 derek boiynsha qylmystyq is qozǵalǵan.
Anyqtalǵan jaǵdailardyń basym bóligi bilim berý uiymdaryndaǵy beinebaqylaý kameralary arqyly áshkerelenip otyr. Sonyń biri – №142 mektepte tirkelgen oqiǵa. Kamera jazbasynda joǵary synyp oqýshylarynyń tómengi synyptaǵy balalardy tizerletip otyrǵyzyp, kúsh kórsetkeni anyq kóringen.
Oqiǵadan keiin mektep direktory jumystan shyǵarylyp, oqý jáne tárbie isine jaýapty orynbasarlarǵa da tártiptik shara qoldanyldy. Qazir bul fakti boiynsha qylmystyq is tergelip jatyr.
Qalalyq bilim bóliminiń basshysy Qýanysh Ysqaqovtyń aitýynsha, býlling tek oqýshylar arasynda ǵana emes, kei jaǵdaida mektep qyzmetkerleri tarapynan da oryn alady. Máselen, bir mektepte qyzmetkerdiń balaǵa kúsh qoldanǵany tirkelgen.
Mamandar býllingtiń aldyn alý úshin mektepterdegi beinebaqylaýdy turaqty qadaǵalap, ata-analarmen tyǵyz jumys júrgizý qajet ekenin aitady.
Resmi derekterge sáikes, býlling saldarynan qaitys bolǵan jaǵdailar tirkelmegen. Alaida mamandar máseleniń ýshyǵyp bara jatqanyn joqqa shyǵarmaidy.
