Foto: El.kz
Shymkentte QR Premer-Ministriniń orynbasary – Mádeniet jáne aqparat ministri Aida Balaevanyń tóraǵalyǵymen Mádeniet jáne óner ýniversitetin qurý máseleleri jóninde keńes ótti, dep habarlaidy Ult.kz.
Keńes jumysyna Shymkent qalasynyń ákimi Ǵabit Syzdyqbekov, QR Mádeniet jáne aqparat ministrliginiń, jergilikti atqarýshy organdardyń, merdiger uiymdardyń ókilderi, sondai-aq M. Áýezov atyndaǵy Ońtústik Qazaqstan zertteý ýniversitetiniń basshylyǵy qatysty.
Jiyn barysynda Aida Balaeva qatysýshylardyń aýqymdy jobany iske asyrý barysy jónindegi baiandamalaryn tyńdady.
Jańa joǵary oqý orny M. Áýezov atyndaǵy Ońtústik Qazaqstan zertteý ýniversitetiniń Mádeniet jáne óner fakýltetiniń bazasynda qurylady. Josparǵa sáikes oqý ornynda 6 fakýltet, 17 kafedra jáne bakalavriat, magistratýra men doktorantýra boiynsha 46 bilim berý baǵdarlamasy jumys isteitin bolady.
Negizgi basymdyq kino jáne televidenie, animatsiia, media-menedjment, tsifrlyq dizain, stsenografiia jáne ózge de baǵyttar boiynsha tehnikalyq kadrlar daiarlaýǵa beriledi.
Sonymen qatar Qazaqstanda alǵash ret tsirk óneri salasy boiynsha joǵary bilimdi mamandar daiarlaý josparlanyp otyr. Sondai-aq restavratorlar daiarlaý da jańa baǵyttardyń biri bolmaq.
Kezdesýde Shymkent qalasynda jańa Opera jáne balet teatryn salý máselesi de qaraldy. Bul nysan boiynsha qala ákimdigi jalpy aýmaǵy 2,8 gektardy quraityn jer ýchaskesin belgilep qoiǵan. Jobaǵa sáikes teatrdyń kórermen zaly 1500 orynǵa laiyqtalyp salynady.
Qazirgi ýaqytta qalada 1984 jyly salynǵan, 330 kórermenge arnalǵan Opera jáne balet teatry jumys istep tur.
