Shymkentte balanyń isheginen magnit, buranda jáne gaika tabyldy

Foto: qalalyq balalar klinikalyq aýrýhanasynyń baspasóz qyzmeti 

Shymkentte dárigerler balanyń isheginen magnit pen birneshe metall zatty alyp shyqty, dep habarlaidy Ult.kz OTYRAR-ǵa silteme jasap.

Qatty ish aýrýyna shaǵymdanǵan bala jedel járdem qyzmeti arqyly qalalyq balalar klinikalyq aýrýhanasynyń qabyldaý bólimine jetkizilgen. Anasynyń aitýynsha, balanyń jaǵdaiy ýaqyt ótken saiyn nasharlap, aýyrsyný basylmaǵan.

«Ýaqyt óte jaǵdaiy jaqsarmady. Ishiniń aýyrǵany basylmaǵan soń, jedel járdem shaqyryp, balany aýrýhanaǵa jetkizdik», – deidi ol.

Qabyldaý bóliminde kezekshi hirýrgter balany tekserip, ish qýysyna rentgenografiia jasaǵan. Tekserý barysynda dárigerler balanyń isheginen bógde zattardy anyqtaǵan.

«Zertteý nátijesinde ishekte magnit, buranda jáne alty qyrly gaika bar ekeni belgili boldy», – dedi mamandar.

Osydan keiin bala shuǵyl túrde balalar hirýrgiiasy bólimine jatqyzylyp, operatsiia jasaldy. Dárigerler bógde zattardy alyp shyqqan. Qazir balanyń jaǵdaiy qanaǵattanarlyq, ol dárigerlerdiń baqylaýynda qajetti em qabyldap jatyr.