Shymkent qalasynyń ákimi Murat Áitenov halyqty vaktsinalaý týraly onlain jiynda mektep direktorlaryn «qamshylaý» týraly tapsyrma bergen orynbasarynyń áreketine pikir bildirdi, dep habarlaidy "Ult aqparat".
«Birinshiden, ol maman jaýapqa tartylatyndai zańdy buzǵan joq. Ol – meniń birinshi orynbasarym. Bul týraly bárimiz bilemiz. Oqiǵa buqaralyq aqparat quraldaryna jaqsy taraldy. Ekinshiden, qazaqtyń «qamshy» degen sózi ártúrli maǵynany bildiredi. Ol tek qamshymen urý degen sóz emes. Qamshylaý degen baqylaýǵa alyp, tikelei tapsyrma berý degen maǵyna da beredi. Men orynbasarymdy shaqyryp, bul másele týraly sóilestim. «Qamshylaý» degendi qandai oimen aitqanyn surady. Ol baqylaýǵa alý maǵynasynda qoldanǵanyn túsindirdi», - dedi ákim ortalyq kommýnkatsiialar qyzmetinde.
Murat Áitenov qazir qalada vaktsinatsiia qarqyndy júrip jatqanyn atap, qalaǵa jetken alǵashqy vaktsinany ózine salǵyzǵanyn eske aldy.
«Qazir jaǵdaidy bilesiz. Vaktsina bárine mindetti emes, biraq vakina alýǵa shaqyrý – ákimshiliktiń jaýapkershiligi. Erteń azamattar aýyryp, basqa da qiyn jaǵdaiǵa ushyrap jatsa, ókinish bolady. Sol sebepti qala turǵyndaryna áli de túsindirip jatyrmyz. Vaktsinadan qorqýdyń qajeti joq. Onyń aǵzaǵa eshqandai ziiany joq. Shymkentke birinshi vaktsina 1 aqpanda jetkizilgen. Sol kezde ózim birinshi bolyp vaktsina alǵanmyn. Qazir, qudaiǵa shúkir densaýlyǵym birqalypty», - dedi shahar basshysy.
Ákimniń aitýynsha, qazir vaktsina alýǵa múmkindigi bar shymkenttikterdiń 44 paiyzy ekpe qabyldaǵan.
