KazMinerals mys óndirýshi kompaniiasy jalaqyny kóterý jáne jumys grafigin ózgertý máselesi boiynsha jumysshylarmen kelissóz júrgizip jatqany týraly málimdedi. Ujymdyq bailanys departamentiniń ókili jumysshylardyń ereýili týraly aqparatty joqqa shyǵardy, dep habarlaidy "Ult aqparat" sputniknews.kz agenttigine silteme jasap.
"Jańa jyl qarsańynda kópshiligin jalaqy máselesi alańdatqany ras. Jumys ujymynda bul másele konstrýktivti dialog túrinde talqylandy. Jumys jinalystary "Vostoktsvetmet" JShS kásiporyndarynda, Artemev shahtasynda ótken. Jýyrda munda "Vostoktsvetmet" JShS basqarma tóraǵasy Ilsýr Daýtov kelip, jumysshylarmen kezekti jinalys ótkizildi, oǵan túngi jáne kúndizgi aýysym jumysshylary qatysty, sondyqtan ereýil nemese jumysqa shyqpaý siiaqty málimetter shyndyqqa janaspaidy. Kásiporyn shtattyq rejimde jumys istep jatyr", — dep habarlady departament ókili Maqsut Japabaev.
Ujymdyq bailanystar departamentiniń málimetine súiensek, kelissózder nátijesin berdi: barlyq jumysshynyń jalaqysy kóteriledi.
"2018 jyldyń 1 qańtarynan bastap Qazaqstandaǵy KAZMinerals diviziialyq toptarynda jalaqynyń tariftik bóliginiń kólemi arttyrylady – makroekonomikalyq ahýal, tutynýshy korzinasy qunynyń artýy men infliatsiia, kásiporyndaǵy ekonomikalyq ahýal eskerilmek. Bul ózgerister qyrkúiek aiynan beri qarastyrylǵan", — dedi Japabaev.
Sonymen birge, Artemev shahtasynyń jumys grafigi 1 aqpannan eki aýysymǵa ǵana bólinetin bolady. Kelesi jinalys Jańa jyl merekesinen keiin ótedi.
