Shyǵys Qazaqstan oblysynda osy aptada 7 adam, onyń ishinde 2 bala sýǵa batyp ketti, dep habarlaidy "Ult aqparat".
ShQO Tótenshe jaǵdailar departamenti baspasóz qyzmetiniń málimetine súiensek, óńir boiynsha osy aptada 7 adam sýǵa ketken. Sońǵy oqiǵa 1 maýsym kúni Miroliýbovka aýylyndaǵy Buqtyrma sý qoimasynda boldy. 1997 jylǵy qyz úrlemeli matraspen jaǵadan alysqa ketip qalǵan. Abaisyzda taiyp ketip sýǵa qulaǵan ol, júzip shyǵa almaǵan.
«Jalpy shomylý maýsymy bastalǵaly beri oblysta 12 adam sýǵa batty. Onyń ishinde 3 bala bar. Negizinen 20-40 jas aralyǵyndaǵy azamattar sýǵa batýda. Olardyń kópshiligi óz kúshterin durys baǵalamaý jáne mas kúide shomylý saldarynan kóz jumǵan. Al balalar ata-analardyń qaraýsyz qaldyrýynan sýǵa ketýde», dedi oblystyq TJD bastyǵynyń mindetin atqarýshy Dmitrii Titov.
Osy rette, departament mamandary óńir jurtshylyǵyn arnaiy jabdyqtalmaǵan jerlerde sýǵa túsýden aýlaq bolýǵa shaqyrady.
