Shyǵys Qazaqstan oblysy Glýbokoe aýdanynda iz-tússiz joǵalyp ketken jetkinshek izdestirilip jatyr, dep habarlaidy "Ult aqparat".
ShQO politsiia departamenti baspasóz qyzmetiniń málimetine súiensek, 24 maýsym kúni keshki ýaqytta Glýbokoe aýdanynyń turǵyny «102» jedel arnasyna qońyraý shalǵan.
Er adam óz sózinde 2008 jylǵy qyzy Knelts Marina Romanovnanyń joǵalyp ketkenin jetkizdi.
«Belgili bolǵandai, 18 maýsymda jetkinshek Cheremshanka aýylyndaǵy úiden syrtqa shyǵyp ketip, sol kúii qaityp oralmaǵan. Qazirgi ýaqytta politsiia qyzmetkerleri jedel-izdestirý sharalaryn júrgizýde. Alaida qyz ázirge tabylmady», - dep habarlady vedomstvo ókilderi.
Sondai-aq izdestirý jumystaryna volonterler de jumyldyrylǵan.
Osy rette, tártip saqshylary Marina Kneltstiń qaida ekenin bilgender bolsa «102» arnasyna habarlasýdy suraidy.
