Suraqtardyń qalai qurastyrylatyny mańyzdy emes, eger belgili bir taqyryp boiynsha materialdy muqiiat oqysańyz, suraqtarǵa senimdi jaýap berýge bolady. Biylǵy oqý jylynyń túlegi Irina Spivakova osylai deidi, dep habarlaidy "Ult aqparat" Bilim jáne ǵylym ministrligine silteme jasap.
UBT-da 110 ball jinaǵan mektep bitirýshi testileý aldynda alańdamaǵanyn jáne áýel bastan aldyna «jaqsy nátijelerge qol jetkizemin» degen maqsat qoiǵanyn atap ótti.
Onyń aitýynsha, testileýde jaqsy kórsetkishke qol jetkizýiniń eshqandai qupiiasy joq. Ol úshin baiqaý synaqtaryna jii qatysyp, test jinaqtary boiynsha tapsyrmalardy kóbirek oryndaý qajet. Osylaisha, kez kelgen aqparat jaqsy igerilip, este uzaq ýaqyt saqtalady.
«Men fizika boiynsha esepterdi, matematikalyq saýat boiynsha testi jii oryndaitynmyn. Eń bastysy - daiyndyqty tiisti deńgeide júrgizseńiz, kóp kúttirmei jaqsy nátijege qol jetkizesiz. Testileý barysyndaǵy suraqtar baiqaý synaqtarynda kezdesken suraqtarǵa uqsas boldy, bul maǵan aitarlyqtai kómektesti. Meniń oiymsha, suraqtardyń qalai qurastyrylatyny mańyzdy emes, eger belgili bir taqyryp boiynsha materialdy muqiiat oqysańyz, suraqtarǵa senimdi jaýap berýge bolady. Osy oraida ustazdaryma alǵys aitamyn, sebebi olarmen birlese atqarylǵan jumystyń nátijesinde jaqsy upai jinadym. Óte qýanyshtymyn» deidi Irina.
Esterińizge sala keteiik, biyl UBT ótkizý erejelerine ózgertýler engizilip, baqylaý kúsheitildi. Ulttyq biryńǵai testileýdi ótkizýdiń birinshi kúni 164 adam tyiym salynǵan zattardy alyp ótýge tyrysyp, Erejelerdi buzǵany úshin UBT tapsyrý múmkindiginen aiyryldy.
Bul rette Irina Spivakova talapkerlerge táýekelge barmaýǵa keńes beredi.
«Barlyq qatysýshylar testileý kezinde smartfondar men shpargalkalardy paidalanýǵa bolmaityndyǵy týraly aldyn ala eskertildi. Ókinishke qarai, endi ereje buzǵan balalar biyl joǵary oqý oryndaryna túse almaidy. Meniń oiymsha, táýekelge barýdyń qajeti joq. Eger siz shpargalka daiyndasańyz da, olardy paidalanbai-aq qoiǵanyńyz abzal» , – deidi Irina Spivakova.
Aita keteiik, 25 tamyzǵa deiin ár aýditoriiadan alynǵan beine jazbalardy mamandar muqiiat zertteidi. Eger beine materialdardy taldaý barysynda tyiym salynǵan zattardy paidalaný nemese basqa da erejelerdi buzý faktileri anyqtalsa, testileý nátijeleri joiylady.
«Bul jańalyqty biz úlken qýanyshpen qabyldadyq. Kalkýliatordy paidalaný múmkindigi berilip, biz óz ýaqytymyzdy aitarlyqtai únemdedik. Al, testileý ýaqytyn arttyrý nátijesinde kúrdeli suraqtardy oilastyrýǵa qosymsha ýaqyt paida boldy. Emtihandy barynsha qaýipsiz tapsyrý úshin testilenýshiler úshin barlyq jaǵdai jasalǵany qýantady. Testileýdi ótkizý pýnktine kirer kezde biz barlyq dezinfektsiialaý kezeńderinen óttik» deidi abitýrient.
Irina Spivakovanyń sózine sensek, mektep túlekteri elemeitin daiyndyqtyń óte mańyzdy bóligi – testileý kúnindegi tańǵy as.
«UBT tapsyratyn kúni jaqsylap uiyqtap turǵanyńyz jón. Ýaiymdaýdyń qajeti joq, óitkeni UBT-nyń barlyq suraqtary mektep baǵdarlamasy boiynsha qurastyrylǵan. Kóptegen suraqtarǵa ońai jaýap berýge bolady, óitkeni bizdiń miymyzdyń belgili bir jaǵdailarda umytylǵan aqparatty qaita jańǵyrtý qasieti bar. Aldymen men barlyq qarapaiym suraqtarǵa jaýap berip, sodan keiin sál qiyndaý tapsyrmalardy oryndai bastadym. Árine, aýditoriiada sizdi alańdatatyn jáne kómek suraityn balalar bolady. Sondyqtan óz kúshińizge sený mańyzdy ekenin umytpańyz», – dep túiindedi óz oiyn Irina.
Aita keteiik, Irina Spivakova - Almaty oblysy Talǵar qalasyndaǵy Iu. Gagarin atyndaǵy №8 mamandandyrylǵan gimnaziianyń túlegi.
