Shortandy kentindegi úide gaz ballonynyń jarylýy saldarynan zardap shekkenderge 6 meditsinalyq brigada kómek kórsetti. Bul týraly jýrnalistermen ótken brifingte Aqmola oblystyq jedel-járdem stantsiiasynyń bas dárigeri Aleksandr Vysotskii málim etti, dep habarlaidy QazAqparat.
Onyń aitýynsha, jedel járdem kómegine politsiia qyzmetkerlerinen 16-da qarasha da keshki saǵat 21:15 shaqyrý kelgen. Onda gaz ballony jarylǵandyǵy jáne úi órtenip, zardap shekkender bary aitylǵan. Saǵat 21:16-de shaqyrý birden jedel járdem brigadasyna joldandy. Oqiǵa ornyna Shortandydaǵy meditsinalyq kómek stansiiasynyń eki brigadasy jetip, sol jerde zardap shekkenderge alǵashqy meditsinalyq kómek kórsetti.
«Eresekter dalada, al balalar kórshilerinde boldy. Olar dereý Shortandy aýdandyq aýrýhanasyna jetkizildi. Budan bólek, qosymsha kómekke Aqkól, Arshaly aýdandary jáne Jaltyr bólimshesinen jedel járdem brigadasy, sondai-aq, eki sanaviatsiia brigadasy jetti. Birinshi brigdada hirýrg reanimatolog bolsa, ekinshisinde Kókshetaý qalasynan balalar reanimatology bar. Jalpy, zardap shekkenderge sol kúni alty jedel járdem brigadasy kómekke tartyldy», - dedi Aleksandr Vysotskii.
Eske sala ketsek, keshe túnde Shortandy kentinde barak tipti úsh páterli úide gaz ballony jaryldy. Aqmola oblystyq TJD bastyǵynyń orynbasary Manarbek Shapaǵatovtyń aitýynsha, órttiń shyǵýyna qarapaiym órt qaýipsizdigi, iaǵni gaz qurylǵysyn paidalaný erejesiniń saqtalmaýy sebep bolǵan.
Aqmola oblysynyń densaýlyq saqtaý basqarmasynyń basshysy Nariman Syzdyqovtyń málimdeýinshe, jarylystan zardap shekken eki balanyń jaǵdaiy óte aýyr, deneleriniń 90 paiyzyn kúiik shalǵan.
«Bizdegi málimet boiynsha úsh adam kóz jumyp, on adam zardap shekti. Jalpy, aýrýhanaǵa 11 adam jetkizildi, onyń ishinde bir qyz bala ambýlatoriiada em qabyldaýǵa jiberildi. Tórt bala shuǵyl Nur-Sultan qalasyndaǵy №2 balalar aýrýhanasynyń anestiziia jáne jansaqtaý bólimshesine jatqyzyldy. Eki eresek adam Nur-Sultandaǵy №1 qalalyq aýrýhananyń kúiik bólimshesine ornalastyryldy. Sonymen birge, Shortandy aýdandyq aýrýhanasynda bir bala men bir áiel stantsionarlyq em qabyldaýda. Qalǵan zardap shekkender ambýlatoriiada em qabyldaidy. Jansaqtaý bóliminde jatqandardyń jaǵdaiy óte aýyr. Onda jatqan eki balanyń biri, 2009 jylǵy ul men 2012 jylǵy qyzdyń deneleriniń 90 paiyzyn kúiik shalǵan. Olar ókpeni jeldetý apparatyna qosylǵan. Kúiik bólimshesine túsken eki er adamdardyń jaǵdaiy da óte aýyr. Olardyń denesiniń 70 jáne 40 paiyzyn kúiik shalǵan», - dedi Nariman Syzdyqov.
