Foto: Olympic.kz
Qazaqstandyq short-trektiń jaryq juldyzy, ulttyq quramanyń ardageri Abzal Ájǵaliev Italiiada ótken XXV qysqy Olimpiada oiyndarynan keiin óziniń áleýmettik jelidegi paraqshasynda jankúierlerine arnap júrekjardy jazba jariialady, dep habarlaidy Ult.kz.
Tórtinshi márte Olimpiada aidynyna shyqqan sportshy ózin álemdik fýtboldyń ańyzy Marko Roispen salystyryp, bul jolǵy dodanyń ol úshin orny erekshe bolǵanyn atap ótti.
«Eger fýtbolda Rois týraly «taǵy da chempion atanbady» dep aitsa, short-trekte bul men shyǵarmyn», — dep aǵynan jarylǵan Abzal, sporttyq jolyndaǵy qiyndyqtar men jeńisterine qaramastan, halyqtyń ystyq yqylasyna bólengeni úshin sheksiz alǵysyn bildirdi.
Sportshy óz úndeýinde tún uiqysyn qiyp, tańǵa deiin jarystardy tamashalaǵan otandastarynyń qoldaýy ol úshin eń úlken marapat ekenin jetkizdi. Ol kóp jyldar boiy elimizde short-trektiń damýyna úles qosyp kele jatqanyn jáne bul jumysty aldaǵy ýaqytta da jalǵastyra beretinin aitty. Ájǵalievtiń aitýynsha, Qazaqstandy short-trekten eń myqty memleketterdiń qataryna qosý — onyń basty missiiasy ári júrek qalaýy.
Sóziniń sońynda olimpiadashy barsha qazaqstandyqtarǵa ótinish tastap, short-trek sportyn tek tórt jylda bir keletin Olimpiada kezinde ǵana emes, kúndelikti halyqaralyq jarystarda da qoldap júrýge shaqyrdy.
«Kelesi Olimpiadaǵa deiin bizdiń sport jaily umytyp ketpeńizder. Bul óte qyzyqty ári tartysty sport túri», — degen Abzal Ájǵaliev aldaǵy ýaqytta da el namysyn abyroimen qorǵaýǵa tyrysatynyn jetkizdi.
Osylaisha, tórt Olimpiadany eńsergen tájiribeli sportshy jas býynǵa úlgi bolyp, qazaq sportynyń bolashaǵy úshin aianbai eńbek etetinin taǵy bir márte dáleldedi.
