Tehnikalyq, kásiptik jáne orta bilimnen keiingi bilim berý uiymdaryna stýdentterdi qabyldaý máselesine qatysty kolledj basshylary birneshe usynys bildirdi, dep habarlaidy QazAqparat.
«Tehnikalyq jáne kásiptik kolledjderdiń basshylarynyń kóbi Bilim jáne ǵylym ministrligine negizgi úsh usynysty joldady. Keibir áriptesterimiz kolledjge qabyldaý kezinde testileý júiesine aýysý kerektigin jetkizdi. Áriptesterimizdiń taǵy biri bul kolledjderge biylǵy UBT-nyń ortasha baly boiynsha qabyldaý kerektigin másele etip kóterdi. Taǵy biri emtihan qabyldaýdy burynǵy formatta qaldyrýdy usynýda. Shyndyǵy kerek, bul máselelerdiń kóterilip otyrǵanynyń ózi – qazirgi sanitarlyq-epidemiologiialyq jaǵdaiǵa bailanysty. Sondyqtan bárimiz de eń birinshi kezekte balalardyń densaýlyǵyna basa mán berýimiz kerek», - dedi QR Bilim jáne ǵylym vitse-ministri Sholpan Karinova BǴM-niń onlain baspasóz máslihatynda.
Vitse-ministr Prezidenttiń Ulttyq qoǵamdyq senim keńesiniń otyrysynda Bilim jáne ǵylym ministrligi men jergilikti atqarýshy organdarǵa júktegen tapsyrmasyn eske saldy.
«Qazir Memleket basshysy jergilikti jerde tehnikalyq jáne kásiptik bilim berý salasyna kóp kóńil aýdaryp, memlekettik tapsyrysty ulǵaitý jóninde tapsyrma berdi. Osy oraida az qamtylǵan otbasylardyń balalaryna, jetim jáne ata-anasynyń qamqorlyǵynsyz qalǵan balalardyń jaǵdaiyna nazar aýdarý kerektigin eskertti. Ministrlik tapsyrmany oryndaýǵa kiristi. Kolledjdermen osy mindetti oryndaý boiynsha josparlar bekitilip, jumysty atqarýǵa kirisip kettik», - dedi ol.
Sholpan Karinova osy rette tehnikalyq jáne kásiptik kolledjderge akademiialyq derbestik berý – Elbasynyń ministrliktiń aldyna qoiǵan maqsaty ekenin tilge tiek etti.
«Prezident naqty kásiporyndarǵa qajetti mamandardy daiarlaýdy tapsyrdy. Bul birinshi eseppen kolledjderge stýdentterdi qabyldaýmen tikelei bailanysty. Mańyzdysy – sapaly kadr. Bul rette kásibi baǵdardy aiqyndaý jumysy erekshe. Neǵurlym ata-analarǵa qai mamandyq balasyna áleýetti, paidaly ekenin túsindirý kerek. Prezidenttiń qoiǵan mindetin oryndaýǵa atsalysýǵa shaqyramyn», - dedi kolledj basshylaryna Sholpan Karinova.
