Shyǵys Qazaqstan oblysynyń politseileri arnaiy operatsiia júrgizip, óńiraralyq esirtki arnasyn joidy, dep habarlaidy "Ult aqparat".
ShQO Politsiia departamenti baspasóz qyzmetiniń málimetine súiensek, politsiia qyzmetkerleri Ulttyq qaýipsizdik komitetimen birlesip, Ońtústik óńirden Shyǵysqa esirtki zattaryn jetkizýmen ainalysqan qylmystyq toptyń jolyn kesý úshin arnaiy operatsiia ótkizdi.
«Sáýir aiynyń sońynda Esirtki qylmysyna qarsy is-qimyl basqarmasynyń qyzmetkerleri buryn sotty bolǵan Jambyl oblysy turǵynynyń sybailastarymen birge esirtki arnalaryn uiymdastyryp otyrǵany týraly aqparat alǵan. Ol marihýana men gashishti júk kóligindegi jasyryn orynǵa salyp, Óskemen qalasyna ótkizý úshin jetkizip otyrdy. Osy shemanyń barlyq qatysýshylary, onyń ishinde esirtkini shahar turǵyndaryna satýdy tikelei júzege asyrǵan adamdardyń jeke bastary anyqtalǵannan keiin quqyq qorǵaýshylar olardy ustaýǵa kiristi», - dep habarlady vedomstvo ókilderi.
Bastapqyda esirtki ótkizgen 43 jastaǵy qala turǵyny ustaldy. Odan 1,5 keli marihýana tárkilengen. Sodan keiin garaj kooperativteriniń birinen esirtki qoimasy tabyldy, onda «qoimashy» degen laqap aty bar 40 jastaǵy Óskemen turǵyny qalaǵa ákelingen esirtkini saqtap kelgen. Ol jerden 74 keliden astam marihýana men 1,7 keli gashish alyndy.
Arnaiy operatsiianyń sońǵy kezeńinde oblys ortalyǵyna asa iri kólemdegi esirtkini taǵy da ákelý kezinde 50 jastaǵy jambyldyq quryqtaldy. Onyń basqarýyndaǵy júk kóligi shanaǵynyń aldyńǵy bóligindegi arnaiy jabdyqtalǵan jasyryn orynnan 300 keliden astam marihýana jáne 8 kelige jýyq gashish tabylǵan.
«Osy esirtki arnasyn joiý barysynda 380 keliden astam ártúrli esirtki zattary alyndy. Qazirgi ýaqytta kúdiktilerge qatysty QR QK-niń 297-babyna sáikes tergeý amaldary júrgizilýde. Atalǵan qylmys úshin olar 15 jylǵa deiingi merzimge bas bostandyǵynan aiyrylýy múmkin». Aldyn ala málimet boiynsha tárkilengen esirtki zattarynyń «qara naryqtaǵy» quny 320 million teńgeden asady», - dedi ShQO PD bastyǵy, politsiia polkovnigi Saǵat Mádiev.
