Foto: semeytany.kz
Qazaqstandaǵy sý qaýipsizdigi máselesi sońǵy jyldary memlekettik saiasattyń negizgi basymdyqtarynyń birine ainaldy. Bul taqyryp Qasym-Jomart Toqaev tarapynan da birneshe ret kóterilip, sý resýrstaryn tiimdi basqarý ulttyq qaýipsizdikpen tikelei bailanysty ekeni atap ótilgen. Alaida osy baǵytta naqty júieli jumystardyń jetkiliksizdigi Parlament deńgeiinde de alańdaýshylyq týǵyzyp otyr, dep habarlaidy Ult.kz.
Osyǵan bailanysty Kenjeǵul Seitjan bastaǵan «Qazaqstan Halyq partiiasy» fraktsiiasynyń depýtattary Úkimetke depýtattyq saýal joldady. Qujatta eldegi sý infraqurylymynyń tozýy men sý resýrstarynyń tiimsiz paidalanylýy ótkir másele retinde kóterilgen.
Depýtattardyń aitýynsha, Qazaqstandaǵy sý qubyry jáne káriz jelileriniń basym bóligi ondaǵan jyl buryn salynǵan. Búginde olardyń tehnikalyq jaǵdaiy nasharlap, qujattamasy eskirgen, al kóp jaǵdaida tsifrlyq esepke alý júiesi múlde joq. Sonyń saldarynan jyl saiyn milliondaǵan tekshe metr sý apattar men aǵyndylar arqyly jerge sińip, bosqa joǵalady.
Onyń sózinshe memleket halyq pen biznesten sýdy únemdeýdi talap etip otyrǵanymen, infraqurylymdaǵy shyǵyndar áli de joǵary deńgeide qalyp otyr.
Osyǵan bailanysty depýtat quzyrly mekeme basshylyǵynan kelesi suraqtarǵa jaýap berýidi surady:
1. Óńirler men iri qalalar boiynsha sýmen jabdyqtaý júielerindegi sý shyǵynynyń naqty kórsetkishteri qandai?
2. Jyl saiyn apattar men aǵyndylar saldarynan qansha kólemde sý joǵalady?
3. Sý qubyry men káriz jelilerine tolyq inventarizatsiia júrgizildi me?
4. Injenerlik jelilerdiń qansha paiyzy tsifrlandyrylyp, geoaqparattyq júielerge engizildi?
5. Oblys jáne qala ákimdikteri tozǵan qubyrlardy jańǵyrtý úshin qandai naqty sharalar qoldanýda?
6. Nelikten birqatar óńirlerde kommýnaldyq infraqurylymdy tsifrlandyrý áli kúnge deiin júieli túrde júrgizilmei otyr?
7. Sý jelileriniń qysymyn, shyǵyny men aǵyndylaryn naqty ýaqyt rejiminde baqylaityn birińǵai ulttyq tsifrlyq júie qurý josparda bar ma?
8. Halyqaralyq tájiribedegi georadarlar men robottandyrylǵan diagnostikalyq júielerdi Qazaqstanǵa engizý máselesi qarastyrylyp jatyr ma?
9. Jerasty injenerlik jelilerin aýqymdy tekserýden ótkizý josparlanýda ma?
Osy aitylǵandarǵa bailanysty Qazaqstan Halyq partiiasynyń parlamenttik fraktsiiasy kelesi sharalardy usynady:
1. Barlyq sý qubyry jáne káriz jelilerine ulttyq inventarizatsiia júrgizý.
2. Qazaqstannyń jerasty kommýnikatsiialarynyń birińǵai tsifrlyq kartasyn jasaý.
3. Sý aǵyndylaryn onlain-monitoringteý júiesin engizý.
4. Sý shyǵynyn azaitýdyń memlekettik baǵdarlamasyn ázirleý.
Ákimdikterdiń sý shyǵyny men jelilerdi jańǵyrtý deńgeii boiynsha ashyq esep berýin qamtamasyz etý.
«Sý – yrystyń kózi». Sý tapshylyǵy kúsheiip jatqan kezeńde árbir joǵalǵan tamshy – el ekonomikasyna kelgen tikelei zalal. Sondyqtan, «Sýdy únemdeý azamattyń asúiinen ǵana emes, memlekettiń qubyrynan bastalýy tiis!»
