Qazaqstan biýdjetine 2014 jyldan beri shetelden keletin eńbek migranttary esebinen 30 milliardqa jýyq teńge tústi. Bul týraly QR Ishki ister ministriniń orynbasary Murat Baimuqashev málim etti, dep habarlaidy QazAqparat.
«Ótken jyly Qazaqstanǵa keletin shetel azamattary úshin tirkeý rásimi alynyp tastaldy. Degenmen biz baqylaýdy toqtatqan emespiz. Búginde elge kelgen sheteldik qonaq týraly viza portaly nemese «e-Qonaq» júiesi arqyly kóshi-qon qyzmeti habar berip otyrady. Sondai-aq, Qazaqstanda zańsyz eńbek migranttarymen kúreste 2014 jyldan bastap engizilgen júie óz jemisin berip jatyr. Iaǵni, atalǵan jyldan bastap jeke tulǵalarǵa elimizde jumys isteýge patent berile bastady. Osy jyldar aralyǵynda eńbek migranttaryna 2 mln-nan astam patent berildi jáne qaita uzartyldy. Jáne biýdjetke 30 mlrd teńgege jýyq salyq tústi», - dedi Murat Baimuqashev QR Parlamenti Májilisinde jasaǵan baiandamasynda.
Onyń aitýynsha, ministrliktiń dittegen maqsaty - qazaqstandyq jáne shetel azamattary quqyǵynyń buzylmaýy.
«Odan bólek, 2017 jyly engizilgen zańnamadaǵy túzetýler shetelden kelgen azmattardy esepke alý men olardyń kóshi-qon protsesine baqylaýdy kúsheitýge múmkindik berdi. Sol siiaqty halyqtyń ishki qonystanýynyń naqty kórinisine qol jetkizdik. Ol óz kezeginde qala, aýdandardy damytýda obektivti josparlaýǵa, jolaýshylar tasymaly aǵynyn anyqtaýǵa oń áserin tigizdi. Jáne densaýlyq saqtaý, bilim berý jáne basqa da halyqqa arnalǵan qyzmetter úshin elimizge qansha adamnyń kelip, ketip jatqany mańyzdy», - deidi ol.
Buǵan deiin habarlaǵanymyzdai, búgin QR Parlamenti Májilisiniń zańnama jáne sot-quqyqtyq reforma komitetinde QR keibir zańnamalyq aktilerine halyqtyń kóshi-qony salasyndaǵy zańnamany jetildirý máseleleri boiynsha ózgerister men tolyqtyrýlar engizý týraly zań jobasynyń tanystyrylymy ótti.
