Foto: daily.afisha.ru
Tailandta aýyr hálge túsip, jasandy komaǵa engizilgen qazaqstandyq týrist esin jidy. 36 jastaǵy azamat ózine qoldaý kórsetken otandastaryna alǵys aityp, arnaiy videoúndeý joldady. Alaida onyń týystary naýqasty Qazaqstanǵa jetkizý máselesin áli sheshe almai otyr, dep habarlaidy Ult.kz KTK telearnasyna silteme jasap.
Aleksei Vivtonenko demalys kezinde aiaq astynan syrqattanyp, dárigerler oǵan jedel pankreatit diagnozyn qoiǵan. Aýrý asqynyp, aǵzalary isten shyǵa bastaǵan soń naýqas eki apta boiy jasandy komada jatqan. Reanimatsiiadaǵy bir táýliktiń ózi shamamen 1 million teńgege túsken.
Osy kezde qazaqstandyqtar beijai qalmai, otbasyǵa qarjylai jáne moraldyq kómek kórsetken. Esin jiǵan Aleksei arnaiy video arqyly alǵysyn bildirip, qazir jaǵdaiy birshama jaqsarǵanyn aitqan.
Degenmen naýqastyń emi áli aiaqtalǵan joq. Uzaq ýaqyt qozǵalyssyz jatqandyqtan, onyń denesinde oiylýlar paida bolyp, ota jasaýǵa týra kelgen. Sonymen qatar dárigerler ókpeden tromb anyqtap, ishine drenaj tútikterin ornatqan. Qazirgi ýaqytta ol ózdiginen otyra da almaidy.
Naýqastyń týystarynyń aitýynsha, Phýkettegi aýrýhanada em jalǵasyp jatyr. Alaida sheteldik azamatqa kórsetiletin barlyq meditsinalyq kómek aqyly bolǵandyqtan, otbasy qaryzǵa batyp ketken. Olar naýqasty Qazaqstanǵa jetkizý áldeqaida tiimdi bolar edi deidi.
Bul máselege qatysty Murat Ábenov memleket tarapynan kómek kórsetilýi tiis ekenin atap ótti. Al Densaýlyq saqtaý ministrligi naýqastyń qazirgi jaǵdaiy meditsinalyq aviatsiiamen tasymaldaýǵa sáikes kelmeidi degen ustanymda.
Týystary bolsa shetelde em alyp jatqan azamatqa kómek suraýyn áli toqtatpaǵan.
