Dárigerler Sharyn shatqalynda bolǵan apattan aman qalǵan 11 jastaǵy qyzdyń jaǵdaiy týraly aitty, dep habarlaidy "Ult aqparat".
Balalar shuǵyl meditsinalyq járdem ortalyǵynyń bas dárigeriniń orynbasary Alýa Jeksenovanyń aitýynsha, aýrýhanaǵa ákelingen 11 jastaǵy oqýshynyń jaǵdaiy ortasha aýyr bolǵan.
«Balanyń kelgen kezdegi jaǵdaiy ortasha aýyr boldy. Qabyldaý bóliminde mamandandyrylǵan kómek kórsetilip, Neirohirýrgiia bólimshesine jatqyzyldy. Oǵan midyń jabyq jaraqaty, midyń shaiqalýy, ortasha aýyrlyqtaǵy gipotermiia, qoly jáne aiaǵynyń kóp jeri soǵylǵan degen diagnoz qoiyldy. Qazir jaǵdaiy turaqty», - dedi Balalar shuǵyl meditsinalyq járdem ortalyǵynyń bas dárigeriniń orynbasary Alýa Jeksenova.
Onyń aitýynsha patsient 7-10 kúnniń aralyǵynda em qabyldaidy.
Esterińizge sala ketsek, 29 mamyr kúni Almaty oblysynyń Sharyn shatqalynda sel júrip, 2 adam mert bolyp, 1 adam iz-túzsiz joǵalǵany, taǵy 6 adam zardap shekkeni habarlanǵan bolatyn.
Keiin Bilim jáne ǵylym ministrligi atalǵan oqiǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumystary júrgizilip jatqanyn málim etken edi.
«Sharyn shatqaly» qyzmetkerleri Sharyn ózeniniń boiyn jaǵalai jer betinde izdeý-qutqarý jumystaryn júrgizý barysynda 30 mamyr tańǵy saǵat 09:34-te 2010 jyly dúniege kelgen qyz balany tapqan bolatyn.
Ol Sharyn ózeniniń sol jaǵalaýynda oqiǵa ornynan 3-4 shaqyrym jerden tabylǵan.
