Sharyn shatqalyndaǵy qaiǵyly oqiǵaǵa bailanysty tergeý júrgizilip jatyr. Bul jaiynda QR BǴM Balalar quqyǵyn qorǵaý komitetiniń tóraǵasy Esenǵazy Imanǵaliev aitty, dep habarlaidy "Ult aqparat".
«Ata-analary men jaqyndaryna kóńil aitamyz. Oqiǵadan bala men muǵalim kóz jumdy. Mundai jaǵdaida komitettiń janynda «Bala qorǵaý» telegramm-chaty jumys isteidi. Qazirgi ýaqytta tergeý is-sharalary júrgizilip jatyr. Almaty oblystyq politsiia departamenti bul sapardy «Radjabi» JShS týristik agenttigi uiymdastyrǵanyn anyqtaǵandyǵyn ǵana aita alamyz. Týrister quramynda Almatynyń №199 mektebiniń 5 synybyn oqityn 8 oqýshy, 5 ata-ana jáne 3 muǵalim bolǵan. Bul áreketterdiń barlyǵy, saiahat mektep ákimshiligimen kelisilmegen», - dedi komitet tóraǵasy Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, demalys jáne saiahat ótkizý jónindegi ádistemelik quralǵa sáikes, qaýipsizdik tehnikasy erejeleri kózdelgen, sonymen qatar balalar tobymen ilesip júretin nusqaýshy bolýy tiis.
Sonymen qatar Esenǵazy Imanǵaliev osy qaiǵyly oqiǵa bailanysty ministr vedomstvoaralyq komissiianyń kezekten tys otyrysyn jariialanǵandyǵyn atap ótti.
Esterińizge sala ketsek, 29 mamyr kúni Almaty oblysynyń Sharyn shatqalynda sel júrip, 2 adam mert bolyp, 1 adam iz-túzsiz joǵalǵany, taǵy 6 adam zardap shekkeni habarlanǵan bolatyn.
Keiin Bilim jáne ǵylym ministrligi atalǵan oqiǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumystary júrgizilip jatqanyn málim etken edi.
«Sharyn shatqaly» qyzmetkerleri Sharyn ózeniniń boiyn jaǵalai jer betinde izdeý-qutqarý jumystaryn júrgizý barysynda 30 mamyr tańǵy saǵat 09:34-te 2010 jyly dúniege kelgen qyz balany tapqan bolatyn.
Ol Sharyn ózeniniń sol jaǵalaýynda oqiǵa ornynan 3-4 shaqyrym jerden tabylǵan.
