Parlamen Senatynyń jalpy otyrysynda depýtat Álimjan Qurtaev elimizdiń ońtústik óńiriniń turǵyndaryn soltústik aimaqqa qonystandyrý jónindegi baǵdarlamanyń júzege asý barysyn synǵa aldy. Osy oraida ol Úkimet basshysynyń orynbasary Eraly Toǵjanovtyń atyna depýtattyq saýal joldady, dep habarlaidy "Ult aqparat".
Senatordyń pikirinshe, ákimdikter kóbinese qonys aýdarýshylarǵa ómir súrý men eńbek etýge laiyqty jaǵdai jasamai otyr.
«Kóshýge niet bildirgen otbasy qonys aýdarýshylardy qabyldaityn aýdandar týraly aqparatqa tolyqtai qol jetkize almaidy. Sondyqtan olardyń tańdaýy shekteýli bolyp otyr. Keibir ákimdikter otbasyn qalaǵan aýylǵa emes, ákimdik ózi kórsetken aýylǵa jiberedi. Taǵy bir másele - turǵyn úi jaiy. Keibir óńirlerde jańa jeke turǵyn úilerdi salý jumystarymen fermerlik sharýashylyqtar ainalysady jáne úilerdi resmi kelisý protsesin tolyq ótkizbesten sala beredi. BAQ-ta jariialanǵan aqparatqa sáikes, qurylystyń sapasy qoiylatyn talaptarǵa jaýap bermeidi», - dedi Álimjan Qurtaev.
Senatordyń usynysy - túsindirý jumystaryn kúsheitý. Ol úshin kem degende jiberýshi jáne qabyldaýshy salalarda Call-ortalyqtar ashý qajet. Onda qonys aýdarýshylarǵa tolyq aqparat jáne olardaǵy barlyq suraqtarǵa jaýaptar berilýi kerek.
«Atalǵan Call-ortalyqtardyń tiimdi jumys isteýi úshin bos jumys oryndary, turǵyn úimen qamtamasyz etý, kórsetilgen oblystarda sharýashylyqtyń qandai túrimen ainalysýǵa bolatynyn, sondai-aq máseleler boiynsha kóshýge niet bildirgen azamattardy habardar ete alatyn mamandardy tartý kerek», - dedi depýtat.
Senator bank nesieleri bar kóship-qonýshylarǵa 6 aidan 1 jylǵa deiingi merzimge nesielik demalys berýdi usynyp otyr. Bul kóbinese kóshý protsesinde týyndaityn qaryzdardan keiin azamattarǵa sýbsidiia berýden bas tartylatyn bolǵandyqtan asa mańyzdy.
