Foto: Senat baspasóz qyzmeti
Qazaqstan Respýblikasy Parlamenti Senatynda múgedektigi bar balalardy keshendi qoldaýǵa baǵyttalǵan jańa zań jobasyn ázirleý máselesi qarastyryldy. Jumys tobynyń alǵashqy otyrysyna senatorlar, sarapshylar men qoǵam qairatkerleri qatysty, dep habarlaidy Ult.kz.
Buǵan deiin Senat tóraǵasy Máýlen Áshimbaevtyń jetekshiligimen ótken Inkliýziia jónindegi keńes otyrysynda múgedektigi bar balalardy qoldaý týraly zańnamany jetildirýdiń mańyzdylyǵy erekshe atalǵan bolatyn. Jańa zań jobasy múgedektigi bar balalarǵa tiimdi áleýmettik jáne meditsinalyq-pedagogikalyq qoldaýdy qamtamasyz etýdi kózdeidi.
Senator Amangeldi Tolamisovtyń aitýynsha, ázirlenip jatqan qujat áleýmettik jáne meditsinalyq-pedagogikalyq kómekti jaqsartýmen qatar, múgedektigi bar balalardyń qoǵamǵa kirigýine jaǵdai jasaýǵa baǵyttalǵan.
«Bul zań múgedektigi bar balalarǵa jańa múmkindikter ashyp, olardyń ómir sapasyn jaqsartýǵa yqpal etedi», – dedi senator.
Qoldanystaǵy zań 2002 jyly qabyldanyp, osy ýaqytqa deiin 70-ten astam túzetý engizilgen. Parlamentshilerdiń pikirinshe, qazirgi zańnama zamanaýi talaptarǵa jáne halyqaralyq standarttarǵa sáikes kelmeidi. Jumys toby músheleri zańnyń 18 babynyń 16-syna ózgerister engizý qajettigin atap ótti. Bul ózgerister memlekettik jáne jeke uiymdar arasyndaǵy is-qimyldardy úilestirýdi, erte anyqtaý tetikterin jetildirýdi kózdeidi.
Zań jobasy múgedektigi bar balalardy ómirdiń barlyq kezeńinde keshendi qoldaý men qoǵamǵa kiriktirýdi qamtamasyz etýge baǵyttalady. Senatorlar jańa qujattyń balalarǵa kórsetiletin qoldaý deńgeiin halyqaralyq standarttarǵa sáikestendirýdi kózdeitinin málimdedi.
Aldaǵy ýaqytta jumys toby zań jobasyna naqty usynystar ázirlep, Senatqa usynady.
