Semei qalasynda jalaqysyn ala almai otyrǵan avtobýs júrgizýshileri jumysqa shyqpai qoidy, dep habarlaidy "Ult aqparat".
«Semey Bus» jáne «Semei Avtobýs parki» JShS qoǵamdyq kólikteri jelige shyqpady. Buǵan eńbek ujymyna jalaqynyń ýaqytyly tólenbeýi sebep bolǵan.
Qala ákimdiginiń málimetine súiensek, búgingi tańda «Semey Bus» basshylyǵynyń zeinetaqy jáne basqa da aýdarymdar boiynsha boryshy jarty milliard teńgeden asyp otyr.
Nátijesinde, olarǵa MÁMS aiasynda qyzmet kórsetilmeýde. Ai saiynǵy zeinetaqy aýdarymy bolmaǵandyqtan, tipti nesiege de ótinish bere almaidy.
Jyl kóleminde júrgizýshiler bir emes, on ret jumysqa shyqpai qoiǵan.
ShQO ákiminiń orynbasary Baqytjan Baiahmetov jáne shahar ákimdiginiń ókilderi jumysshylarmen kezdesip, kelissóz júrgizdi.
«Árqaisyńyzdyń qolyńyzda eńbek sharty bar. Osy sharttarǵa sáikes, sotqa júginýge jáne tiisti shegerimderdi talap etýge quqylysyzdar. Buǵan eshqandai kedergi joq. Alaida avtobýstardyń qatynaýyn toqtatý durys sheshim emes. Qala turǵyndarynyń kinási nede? Bul úshin nege halyq zardap shegýi tiis?», - dedi Baqytjan Baiahmetov.
Bul rette ol aýdarymdardy óndirip alý úshin eńbek ujymy «QR zeinetaqymen qamsyzdandyrý týraly» Zańyn buzǵany úshin kásiporyndy sotqa berý qajettigin atap ótti.
Osyǵan sáikes, mindetti zeinetaqy jarnalarynyń aýdarylmaǵan somasyn memlekettik kiris organdary óndirip alatynyn nemese merzimin ótkizip alǵan árbir kún úshin QR Ulttyq bankiniń bazalyq mólsherlemesiniń 1,25 eselengen mólsherinde ósimpul eseptei otyryp, jumyskerlerdiń paidasyna aýdarylatynyn málimdedi.
