Semei qalasynda muǵalimderdiń 68 paiyzy COVID-19 infektsiiasyna qarsy vaktsina aldy, dep habarlaidy "Ult aqparat".
ShQO ákimi baspasóz qyzmetiniń málimetine súiensek, aimaq basshysy Danial Ahmetov Semei qalasynda jańadan taǵaiyndalǵan ákim Baqytjan Baiahmetovpen jáne depýtattarmen jinalys ótkizip, birqatar máseleni talqylady. Jiyn barysynda jaqyn arada atqarylýy tiis jumystardyń jospary belgilendi.
«Depýtattar vaktsinatsiialaý protsesin jandandyrýǵa atsalysýlary kerek. Sebebi, Semeide bul protsess baiaý júrip jatyr. 1 qyrkúiekke deiin barlyq muǵalim vaktsina alýy tiis. Óitkeni olar balalarmen tikelei jumys isteidi. Al búgingi tańda pedagogtardyń 68%-y ǵana vaktsina alyp otyr», - dedi Danial Ahmetov.
Sondai-aq shahardy jylýmen qamtamasyz etý máselesi de sóz etildi. Qazir Semeidegi barlyq qazandyqty jóndeý jáne rekonstrýktsiialaýdan bólek, olardyń qýatyn arttyrý boiynsha da jumys júrgizilýde.
«Qalany damytý jumystaryn jalǵastyramyz. 1200 jáne 300 oryndyq eki jańa mekteptiń qurylysy júrip jatyr. El prezidenti Qasym-Jomart Toqaevtyń tapsyrmasy boiynsha Semei iadrolyq poligonyndaǵy synaqtan zardap shekken azamattar úshin ońaltý ortalyǵynyń qurylysy da bastalady. Sonymen qatar Beibitshilik aralyn qaita jańǵyrtý jobasy ázirlenetin bolady. Ol jer qala turǵyndary demalyp qana qoimai, sportpen shuǵyldanatyn orynǵa ainalýy tiis», - dedi oblys ákimi.
Jergilikti jurt úshin mańyzdy taǵy bir joba – avtokólik kópirin jóndeý. Danial Ahmetov jańa ákimge depýtattarmen birge asfalt tóselmegen joldary bar kóshelerdi jóndeý jóninde aýqymdy baǵdarlama ázirleýdi tapsyrdy.
