Foto: parlam.kz
Májilis depýtaty, «OSDP» fraktsiiasynyń jetekshisi Ashat Rahimjanov qazaqstandyq laýazymdy tulǵalardyń amerikalyq qarjyger Djeffri Epshteinmen yqtimal bailanystaryn tekserýdi surap Qazaqstan Respýblikasynyń Bas prokýrory Berik Asylovqa jáne Ulttyq qaýipsizdik komitetiniń tóraǵasy Ermek Saǵymbaevqa depýtattyq saýal joldady, dep habarlaidy Ult.kz.
Depýtattyń málimetinshe, shetelde jariialanǵan «Epshtein faildarynda» «Eski Qazaqstan» kezeńindegi saiasi elita ókilderiniń esimderi kezdesedi. Atap aitqanda, burynǵy Premer-Ministr jáne UQK-niń eks-tóraǵasy Kárim Másimovtiń aty keminde segiz ret atalady delingen. Qujattarda Epshtein men Másimovtiń jeke tanystyǵy bolǵany kórsetilýi múmkin ekeni aitylǵan.
"Kóptegen suraqtar týyndaidy. Nelikten joǵary laýazymdy qazaqstandyq sheneýnikke Epshteinmen kezdesýdi ózi bastamalap, júzdesý qajet boldy? Bul kezdesýler qai aýmaqta ótti? Álde sol atyshýly aralda bolǵan joq pa?" - deidi Rahimjanov.
Sondai-aq depýtat sheteldik BAQ-ta jariialanǵan materialdarǵa súiene otyryp, Epshteinniń Niý-Iorkte burynǵy vitse-premer, Ulttyq bank eks-tóraǵasy Kairat Kelimbetovpen birge demalǵany týraly aqparatqa nazar aýdarǵan.
"Eske salaiyn, ótken kezeńde Q. Kelimbetov Premer-Ministrdiń orynbasary qyzmetin atqaryp, Ulttyq bankti basqarǵan. Taǵy da suraq týyndaidy – Kelimbetovke bul kezdesýler ne úshin qajet boldy? Álde bul júzdesýlerdi óz múddesi úshin Epshteinniń ózi bastamashy boldy ma?
Hat-habar almasýda Masimov pen Kelimbetovtiń Djeffri Epshteinmen bailanystary men kezdesýleri talqylanady, jeke sálemdemeler joldanyp, túrli ortaq is-sharalar sóz bolady. Sondai-aq esimi atalmaǵan ózge de tulǵalar, mysaly, memlekettik qaýipsizdikke jaýapty joǵary laýazymdy bir general týraly aitylady. Bul kim? Bálkim, bul taǵy da sol Masimov bolýy múmkin be?" - dep taǵy suraq qoidy ol.
Sonymen qatar depýtattyń sózinshe jariialanǵan qujattardan Epshteinniń Qazaqstanǵa birneshe ret kelgeni belgili bolady. Degenmen faildarda onyń elimizdegi barlyq bailanystary tolyq kórinis tappaǵan bolýy yqtimal.
"Atalǵan janjalǵa qatysty halyqaralyq jariialanymdarda AQSh-ta mán-jaiy tolyq anyqtalmaǵan jaǵdaida qaza tapqan qazaqstandyq model Rýslana Korshýnova da atalady. Eske salaiyq, sóz jai ǵana jeke tulǵa týraly emes, kámeletke tolmaǵandardy seksýaldyq qanaýdyń halyqaralyq jelisin uiymdastyrýshy dep tanylǵan, saiasi, qarjylyq jáne barlaý ortalarymen turaqty bailanysy bolǵan adam týraly bolyp otyr", - dedi Ashat Rahimjanov Májiliste.
Depýtattyń saýalynda kelesi suraqtar qoiylǵan:
Djeffri Epshtein Qazaqstanǵa qandai maqsatpen kelgen jáne kimdermen kezdesken?
Qyzmettik nemese qupiia aqparattyń syrtqa shyǵý derekteri bolǵan ba?
Memlekettik sheshim qabyldaityn tulǵalarǵa syrtqy yqpal etý arnalary qalyptasty ma?
Bul bailanystar sol kezdegi el basshylyǵy tarapynan sanktsiialanǵan ba?
Depýtat «Epshtein faildarynda» atalǵan qazaqstandyq laýazymdy tulǵalar men olarmen bailanysty adamdar týraly aqparatty tekserýdi; Qazaqstan aýmaǵynda nemese shetelde basqa da saiasatkerlerdiń, kásipkerlerdiń jáne shoý-biznes ókilderiniń Epshteinmen bailanystary bolǵan-bolmaǵanyn anyqtaýdy; Ulttyq qaýipsizdikke tónýi múmkin qaterlerge quqyqtyq baǵa berýdi; Tekserý nátijelerin Parlament pen qoǵamǵa jariialaýdy suraidy.
