Foto: Aqmola oblysy TJD
Shýchinsk qalasynda bolǵan joiqyn jarylys jeti adamnyń ómirin qidy. Taǵy ondaǵan adam túrli deńgeide jaraqat aldy. Qaiǵyly oqiǵaǵa bailanysty jergilikti bilik marqumdardyń otbasyna jáne zardap shekkenderge birjolǵy qarjylai kómek kórsetiletinin málimdedi, dep habarlaidy Ult.kz.
Shýchinsk qalasyndaǵy dámhanada bolǵan jarylystan keiin jaǵdai jedel baqylaýǵa alynyp, arnaiy shtab qurylǵan. Bul týraly Býrabai aýdany ákimi Arai Sadyqov habarlady.
Onyń aitýynsha, qaza tapqandardyń otbasyna 2 million teńgeden, al jaraqat alǵan azamattarǵa 1 million teńgeden birjolǵy materialdyq kómek beriledi. Sonymen qatar ákimdik jerleý rásimderin uiymdastyrýdy óz moinyna alǵan.
Dárigerlerdiń málimetinshe, jarylys saldarynan 4 adamnyń jaǵdaiy óte aýyr. Jalpy oqiǵa ornynda 5 adam kóz jumsa, taǵy eki adam aýrýhanaǵa jetkizilgennen keiin qaitys bolǵan.
Aqmola oblystyq densaýlyq saqtaý basqarmasy basshysy Nariman Ermekniń aitýynsha, Býrabai aýdandyq aýrýhanasynyń jansaqtaý bóliminde aýyr jáne asa aýyr haldegi tórt naýqas jatyr. Úsh adam travmatologiia bóliminde em qabyldaýda, segizi ambýlatoriialyq baqylaýda. Alty naýqas Kókshetaý qalasyndaǵy kópsalaly oblystyq aýrýhanaǵa jetkizilgen.
Eske salaiyq, 26 aqpan kúni saǵat 22:01-de Tsentr plova dámhanasynda gaz-aýa qospasy jarylyp, 7 adam qaza tapty. Jalpy 21 adam zardap shekti, olardyń arasynda 16 jastaǵy jasóspirim qyz bar.
Qazir jarylystyń naqty sebebi anyqtalyp jatyr. Qoǵam nazaryn aýdartqan bul oqiǵa qaýipsizdik talaptarynyń saqtalýyna qatysty ótkir suraqtardy qaita kóterdi.
