«El tiregi» bastamashyl tobynyń uiymdastyrýshy Nurjan Áltaev aliment boiynsha boryshker, sondai-aq biyl alimentin keshiktirip tólegendikten, aiyppulmen qosyp 2 mln teńge tólegen, dep habarlaidy Ulysmedia.kz.
Bul týraly Ortalyq kommýnikatsiialar qyzmetinde ótken baspasóz máslihatynda Ádilet ministri Marat Beketaev jýrnalist saýalyna jaýap bergende atap ótti.
Ol saiasi partiia retinde tirkelý týraly ótinish bergen bastamashyl toptardyń ne sebepti tirkele almaýynyń sebebine toqtala kele, «El tiregi» bastamashyl tobynyń nege tirkeýden óte almai júrgenin mysalǵa keltirdi.
«Onyń negizgi uiymdastyrýshysy – Nurjan Áltaev. Ol birneshe ret túrli alańdarda, túrli forýmdarda ózderin negizsiz tirkemegenin málimdedi. Munda eki máseleni atap ótý kerek. Qujattaryn qaita-qaita usynǵanymen, is júzinde ózgertilmegen. Biz anyqtap kórsetken kemshilikterdi túzetpesten 16 ret usyndy. «Nege olai istep júr?» degen suraq týyndaidy. Múmkin, tirkeýden óte almai júrgen saiasi qurbannyń beinesin jasaǵysy keltin shyǵar. Qujattaryn ózgertpesten ákele bergendikten, biz ony tirkeýden bas tartatynymyzdy málimdeýge májbúrmiz», – dedi Marat Beketaev.
Sondai-aq, ministr Nurjan Áltaevti jeke qabyldaǵanyn jáne onyń aliment tóleýden jaltarǵanyn da atap ótti.
«Jeke qabyldaýǵa kelgende taǵy sol shaǵymyn aitty. Men oǵan qujattaryn retke keltirý kerek ekenin aityp, keńes berdim. Onyń is-áreketine baǵa bereiin dep otyrǵan joqpyn, keibir derekterdi aitaiyn. Nurjan Áltaev birneshe ret aliment tólemei boryshker bolǵan. Birneshe ret sot oryndaýshy habarlaǵanda ǵana tóledi. Sońǵy ret biyl jazda shamamen 2 mln teńge tóledi. Aliment keshiktirilip ótelgendikten, ákimshilik aiyppul da tóledi. Osymen toqtaiyn», – dedi ministr.
Eske sala keteiik, 2020 jyly «Nur Otan» partiiasynyń qatarynan shyǵyp, óz aldyna bólek partiia qurǵysy kelgen Májilis depýtaty Nurjan Áltaevtyń depýtattyq ókilettigi toqtatylǵan bolatyn. Eks-depýtattyń bes balasy bary aitylady.
