QR Saýda jáne integratsiia ministri Baqyt Sultanov azyq-túlik baǵasyn turaqtandyrý úshin birqatar sharany qolǵa alýdy usyndy, dep habarlaidy QazAqparat.
«Qazirgi ýaqytta memlekettik organdar baǵany turaqtandyrý boiynsha Jol kartasynyń sharalaryn iske asyrý boiynsha jumys júrgizýde. Búginde 12 is-shara oryndalmaǵan, onyń ishinde Aýyl sharýashylyǵy ministrligi 9 sharany oryndamaǵan, Saýda jáne integratsiia ministrligi - 2, jergilikti atqarýshy organdar - 1», - dedi Saýda ministri búgingi Úkimet otyrysynda.
Osyǵan bailanysty Saýda ministri Úkimet basshysynan kelesi tapsyrmalardy berýin surady.
«Aýyl sharýashylyǵy ministrligine birinshiden, shuǵyl túrde ai saiyn ózektendire otyryp, azyq-túlik taýarlarynyń óndirisi, importy, eksporty, qolda bar qorlar men tutyný teńgeriminiń boljamyn ázirleý kerek. Bul, baǵanyń ósýine yqpal etý faktorlaryna ýaqtyly taldaý júrgizýge múmkindik beredi.
Ekinshiden, sýbsidiialar alǵan kezde áleýmettik mańyzy bar azyq-túlik taýarlaryna baǵany turaqtandyrýǵa baǵyttalǵan aýyl sharýashylyǵy taýaryn óndirýshilerine naqty qarsy mindettemelerin engizýdi jedeldetý qajet», - deidi Sultanov.
Sonymen birge, ákimdikterge forvardtyq satyp alýdy qarjylandyrýdy 10 mlrd teńgege deiin jáne «ainalym shemasyn» qarjylandyrýdy 50 mlrd teńgege deiin jetkizý usynyldy.
«Sizdiń birinshi orynbasaryńyz bul tapsyrmany birneshe ret oblystarǵa jetkizdi. Degenmen ol tapsyrmany oryndaýdy pysyqtaý qajet. Ekinshiden, saýda sýbektileriniń baǵalardy turaqtandyrý jónindegi memorandýmdarda kózdelgen mindettemeleriniń oryndalýyn qatań baqylaýǵa alý qajet», - deidi Saýda jáne integratsiia ministri.
